WILLIAMNAGAR: East Garo Hills a·jani Williamnagar-o donggipa Rongrenggre Higher Secondary School-ni gitcham principal Ahsan Habib, adita salrangna skang a·gilsakko watangaha.
Ahsan Habib, 1939 bilsini July 17 tariko, Assam a·dokni Mangaldai songo atchiaha aro ua graduate ong·ani ja·man, Adokgre High School-o headmaster ong·e kamko ka·chengahachim. 1968 bilsioni 1970 bilsiona Adokgre-o headmaster ong·e kamko ka·ani ja·man ua Rongrenggre High School-o headmaster ong·e kamko ka·eskaaha.
Uni kamrangna ua East Garo Hills a·jao nambatgipa skigipani upattiko 1995 bilsio man·aha aro a·dok gimiko nambatgipa skigipani upattikoba 1996 bilsio man·aha.
1997 bilsio uko Mallangkona Higher Secondary School-ni principal ong·e kam ra·jitangskaaha aro uandaken kamoni neng·takkujaskal ua apsan skulon 1999 bilsini March 31 tarikona kamko ka·angaha.
Ia 2023 bilsini April 5 tariko ua be·enni gita an·senggijaniko man·na a·bachengaha aro uandaken uko re·anggipa April-ni 7 tariko nambate sannaniko on·na gita Tura-ni Holy Cross Hospital-ona ra·angahachim indiba saoni nampilna gita man·jae ua apsan salni attam 6:45 bajimango a·gilsakko watangaha.
Uni siangani ja·man uko mande ra·bee Williamnagar-on gope galaha aro uni siangani ja·man a·dokni PHE Minister aro Williamnagar-ni MLA Marcuise N Marak-ba kalimpaaniko parakataha.
