SHILLONG: Dingtang dingtang political dolrang aro NGO-rangni didianiko man·engani gimin a·dok sorkari, roster system-ni bidingo da·o changgipin Cabinet tom·anio chanchirimna tik ka·angaha.
A·dokni Deputy Chief Minister Prestone Tynsong-ni parakatani gitade, Meghalaya High Court-ni gital ge·etaniko on·anio pangchake Cabinet, ia roster system-ni bidingo chanchirimgen.
“Roster system-ni bidingo skanggipa Cabinet tom·e chanchirimanggen aro uni ja·man MDA-o bakrimenggipa dolrang baksa chanchirimgen. Nanggenchim ong·ode ia Roster system-ni gimin chanchirimna gita chinga pilak dolrangni tom·anikoba ong·atanggen,” ine Tynsong, kobor ra·timgiparangna parakataha.
Roster system-ni bidingo chanchirimna gita Assembly-ni special session-ko ong·atchina VPP aro KHNAM dolrangni dabienggipani gimin sing·on, iani bidingo Cabinet name chanchirimna siengani gimin special session-ko ong·atna nangani katta dongja ine Deputy Chief Minister parakataha.
Mikkangchini giminsa nie roster system-ko tarichina dabienggipani gimin sing·skaon, roster system-ko ra·gatchina ge·etaniko on·chengaonin, mikkangchini gimin nie roster system-ko tarina man·ama man·jawa uko High Court-o sing·na gita sorkari, changgittam affidavit ka·ahachim ine Tynsong parakataha.
“Reservation policy-ko ra·gatchengaonin roster system-ko tarina nanggen inesa High Court raiko on·aha aro iani giminsa chinga 1972 bilsiona re·angpilna nangaha,” ine Deputy CM parakataha.
State reservation policy-ko nipiltaichina dabianiko sorkari knachakgenma ine sing·anina aganchakaniko on·angskaengon, da·o dipetde sorkari, roster system-ni giminsa kamko ka·na nangenga aro iako namatchengna nangenga ine Tynsong parakataha.
