SHILLONG: Me·chik bi·sako til·ekani gimin gitcham MLA Julius Dorphang-ko bilsi 25-na pattoko donchina ge·sa trial court-ni rai on·giminko High Court jakdangdikna jechakaha.
Chief Justice Sanjib Banerjee-ni skotong ong·e chanchidilgipa High Court bench, ia mamlani bidingo Bristibaro chanchianiko dakaha, aro a·selo ga·akgipa me·chikna lak 20 tangkarangko jagittamni gisepon gamchina gita ge·etaniko on·aha.
“Bilsi 25-na pattoko donatchina gita trial court-ni rai on·gimino jakdangdikna jechakan baksa gitcham MLA-ni mol·mole file ka·gipakoba jechake bon·ataha’’ ine high court bench aganaha.
Dorphang, 2007 bilsio an·tangko police-na bame on·na skangde, Hynniewtrep National Liberation Council (HNLC)-ko a·bachengdilgipa aro uni chairman ong·achim, ja·mano ua 2013 bilsio assembly election-o susae Mawahati assembly seat-o cheahachim, ua 2017 bilsio, MLA ong·mitingo saksa bilsi 14 ong·gipa me·chik bi·sako til·ekaha ine badi ka·ako man·enba Protection of Children from Sexual Offences (POCSO) Act aro Immoral Trafficking Prevention Act-o rim·ako man·ahachim.
Uko Nongpoh district jail-o donahachim indiba sabisini a·sel 2020-o una Meghalaya High Court jaminko on·aha.
