SHILLONG: Meghalaya Police department-o ge 3500-oni ge 4000-mangni gita kamrang bangbang ong·e dongenga ine Sukrobar salo, a·dokni Deputy Chief Minister aro Home (Police) Minister Prestone Tynsong parakataha.
Sukrobar salo ua, Police department-ni kamrangko nipiltaina gita tom·aniko ong·atangani ja·man iako parakataha.
Tynsong-ni parakatani gitade, Police department-o ge 4000-mangni gita kamrangko gapatna nangenganian uamangna dal·batsranggipa ra·biani ong·enga.
Ge 1000-mangni gita kamrangko gapatna gitade personal interview-rangko ra·engaha ine janapatengon, interview-rangko ra·ani kamrang matchotahaon uamang kam ka·giparangko ra·na a·bachengatgnok aro ia bilsini gisepo bangbang ong·e dongenggipa kamrangko gapatna sorkari jotton ka·gen ine Home Minister parakataha.
Bangbang ong·e dongenggipa kamrangko gapatahaon, police-rangni kamko nambate ka·na man·gnok aro police-rangkoba ka·dongbatatna dakchakgnok ine Tynsong parakataha.
