SHILLONG: Meghalaya a·doko education policy ra·gataniko sorkari nipiltaigen ine Mongolbar salo, a·dokni Education Minister Rakkam A Sangma parakataha.
State education policy-ko ra·gatani bidingo janapatengon, “State education policy-ko ra·gatna chinga kamrangko ka·engaha aro uni kosako chingo National Education Policy-ba donga. Ia education policy-rangko da·o dipet chinga matchotkujaenga indiba kamrangko ka·engmiting,” ine Sangma parakataha.
Education Minister-ni parakatani gitade, tangka paisani gita neng·nikanirangko man·engani a·sel mitam niamrangko ra·gataniode sorkari neng·nikanirangko man·naba gnang indiba a·dokni chatro chatrirangko mikkangchi nambataona tarisamsona gita namgipa lekka porako on·na kamrangko ka·enga.
State education policy-koma national education policy-ko ra·gatna sienga ine sing·anina aganchakaniko on·angengon, “Minggnikon man·chape ra·gatnade miksonganirang donga indiba National education policy-ara namen bakrodugaa indiba state education policy-ara a·doko lekka porako nangani kri tarigimin ong·a aro unbaksana iano national education policy-onikoba chinga ra·chapenga,” ine Sangma parakataha.
“Uni gimin da·o dipet chinga iarangko tariengkumiting aro bakan chinga iako nipiltaianggen,” ine ua aganaha.
A·doko chatro chatrirangko namdapatna gita a·dok sorkari, CBSE curriculum-ko ra·na gita miksonganirang dongenga ineba Education Minister parakataha.
“Ian chu·gimikkode ong·janaba gnang indiba an·chingni chatro chatrirang, a·songni gipin biaprang baksa apsan ong·pana man·na gita chinga nambata cholrangko nienga,” ine Sangma aganaha.