TURA: Budbar saloni a·bachenge Garo Hills-o load shedding ba bijoli kimitaniko konta 10-ona bariatahani gimin Tura-ni MDC Bernard N Marak, suk ong·gijaniko parakataha.
Iana skangde Garo Hills-o bijoliko salo kontasni ka·e kimitrongengachim indiba Budbar salonide pring 5:00 bajioni pring 10:00 bajiona, uni ja·man salni 12:00 bajioni attam 1:00 bajiona aro attam 3:00 bajioni attam 6:00 bajiona bijoliko kimite waloba 10:00 bajioni 11:00 bajiona gimik konta 10 ka·e bijoliko kimitna a·bachengahachim.
Iandake Garo Hills-o MePDCL-ni bijoli kimitani somoiko baridapatahani gimin sing·doatengon, ian gipinrangni ong·gija dakanina Garo Hills-ni manderangkosa sasti on·na gita ong·enga ine Tura-ni MDC Marak parakataha.
Grid-oniko nangana bate ra·ahani gimin Garo Hills-o bijoli kimitani somoiko bariatchina SLDC-ko ge·etaha ine MePDCL-ni janapatgipa kattarangni bidingo sing·doatskaengon, “Sawa grid-oniko nangana bate bijoliko ra·aha? Maini gimin Garo Hills-osan bijoli kimitaniko chakna nangenga? Ma ian Garo Hills-ni manderangsa bijoliko cha·uaha ine miksongani ong·engama?” ine Marak sing·doataha.
“Garo Hills-o konta 10 bijoliko kimitaniara namen kraani ong·ja aro manderangna sastiko on·na gita ong·enga. Somoi gita kajinarangko game bijoliko jakkalenggiparangna aro BPL Saubhagya-ni namgniko man·paenggiparangnaba ian namen nangchakeaniko ra·baenga,” ineba Tura-ni MDC parakataha.
Ia bilsini a·bachengachibara a·dok sorkarini a·bachengate on·gipa Ganol Hydro Electric Power project-ni bidingo sing·doatskaengon, ia project matchotaha ong·ode ta·raken chalaina gita nangenga maina ia project-chiba Garo Hills-ni manderangna chu·onga gitan bijoliko on·na man·genchim ine Marak parakataha.
“Garo Hills-o skangonin bijoli sisimsimani a·sel manderang neng·nikanirangko chaktokengachim indiba da·o salon konta 10 ka·e bijoliko kimitaniara manderangni janggi tanganikon champenga gita ong·engaha,” ineba Marak parakataha.
