SHILLONG: Khasi aro Jaintia Hills a·jarango donggipa dam 36 constituency-rangoni dam 25 constituency-rangde state reservation policy-ko taridapjachina nangnikenga aro ia reservation policy-ko ‘dangtapgenchimode’ an·tangtangkon saknaataniona ra·baaming apsan ong·enga ine Budbar salo, United Democratic Party (UDP)-ni dilgipa aro MDA sorkario Cabinet Minister ong·enggipa Paul Lyngdoh parakataha.
“Reservation policy-ko taridapanian UDP-ni skanggipa election manifesto ong·achim indiba chingni susagipa dam 46 constituency-rangoni chinga dam 11 seat-rangosan cheaiaha. Khasi aro Jaintia Hills a·jarangko niatgenchimoba dam 36 constituency-oni chinga dam 11-osan cheaiaha,” ine Lyngdoh parakataha.
Lyngdoh-ni parakatani gitade, dam 36 constituency-oni dam 11 seat-rangkosan cheaia ong·ode uan bangki constituency-rangde reservation policy-o dingtanganiko nangnikgijagiparangsa ong·aiahachim.
“Uni gimin dam 36 constituency-oni chinga dam 11 seat-rangkosan cheaiaha ong·ode bangki dam 25 constituency-rangde reservation policy-ni dingtanganiko nangnikgijaniko mesokanisa ong·aha,” ine UDP Minister parakataha.
Roster system-ni gimin janapatskaengon, “Skanggipao, mikkangchini gimin roster system-ko tarichina, gnigipao na·simang an·tangtangan Supreme Court-ona ra·angchina aro gittamgipao Assembly-on MLA-rang an·tangtang chanchie tik ka·china anga an·tangde agangenchim,” ine Lyngdoh parakataha.
“Badia chol nambatgen ukode Assembly aro Cabinet-sa tik ka·aichinaha,” ineba ua aganaha.
Regional party-rangoni dolsade roster system-ko jegalenga ong·ja indiba reservation policy-ko nipilchinasa nangnikenga ine gisik ra·ataniko on·angengon, “UDP-ni sak 11 aro VPP-ni sak 4 MLA-rangko chandimgenchimoba sak 15-san ong·enga. Sak 36-oni sak 15-de majority ba bang·bata ong·kujaenga. Indiba anga MDA-ni ku·wattimgipa ong·e iako aganenga, chinga ia antini bon·angachibara ong·jaode mikkang antini skanggipa bakon iani gimin chanchina sienga,” ine UDP-ni dilgipa parakataha.
Iani bidingo Cabinet-ni tom·anio aro pilak political dolrangni tom·anioba chanchirimna siengani gimin ia tom·anirango dilgiparangni chanchianirangko nambate ra·na man·gen ineba ua aganaha.
Reservation policy-ko taridapgenchimode mai ong·gen ine sing·on, “Skanggipa an·ching pilakni gitan iako niatna nangao ga·akenga. Gnigipade sorkarini kamrangara bon·ani donga ine na·simangba ma·sia aro gittamgipade ia dakgualaniko bilsi 50 skangan dakahachim,” ine Lyngdoh parakataha.
Bilsi 50-na skang dakgualgimin kamko jabonga ba salbongani gisepode namatna man·jawa indiba ka·sine ka·sinede man·gen ineba ua aganaha.
Reservation policy-ko dangtapanio kenchakna nanganirang donggenma ine sing·anina aganchakaniko on·angskaengon, “Iano dingtang dingtang ja·ku de·na nanganirang donga aro an·ching an·tangtangni ja·arangko goe bon·atna nangja. Uni gimin an·ching an·tangtangko saknaa man·atjana,” ine UDP-ni Minister parakataha.
