SHILLONG: Meghalaya a·doko badiaba badiaba political dolrang, job reservation policy aro roster system-ni bidingo ku·rang on·e, doltangtangko bilakbatatna jotton ka·enga ine Robibar salo, Meghalaya a·dokni All India Trinamool Congress (AITC) matnangataha.
Dingtang dingtang political dolrangni dilanichi da·ororo reservation policy aro roster system-ni gimin jera ra·grikanirang batroroengon, chadamberangni janggi tangani cholrangni bidingo darangba politics kal·na nangja ine Lyngdoh parakataha.
Chadamberang cholrangko man·jaengani gimin darang political dolrangba ‘politics’ kal·na nangja ine janapatengon, “Adita salrangna skang police department-ni kamrango ra·anio ge 1300 ba 1400 kamrangko advertise ka·ahachim aro mitam chadamberangde dingtang dingtang kamrangna dorgastorangko galahani gimin dorgasto galgiparang lak 1.3-na batpilahachim,” ine Lyngdoh parakataha.
Ge 1300-1400 kamrangna sak 30,000-40,000-mangni gita candidate-rang dorgastorangko galengnaba gnang ine janapatengon, iano chadamberang kamrangko ka·e cha·na cholrangko man·jaenganisan ong·ja indiba mitamde nambata kamrangko ka·e cha·naba cholrangko niengani gimin da·o advertise ka·gipa kamrangna baten dorgasto galgiparangan chang 100 ba chang 500-mnang batskaenga ine AITC-ni vice president parakataha.
“Badiaba kamna Khasi, Jaintia ba Garo candidate-rangoniko ra·genchimoba ia jatgittamonin bang·bea chadamberang kamrangko man·tokjawa. Ge 1000 kamrangna sak 50,000 candidate-rang dorgasto galgenchimoba sak 1000 candidate-rangsan kamkode man·aigen aro sak 49,000-de kamrangko man·pajawa,” ine Lyngdoh talataniko on·angaha.
