SHILLONG: Meghalaya a·doko skul aro college-rangko chalaiani bidingo a·dok sorkarina ku·pattie on·na gita bakan Education Commission-ko songgnok.
Sombar salo, sorkarioni koborko on·ani gitade, da·o ia commission-ni membor-rangko songna gita sandiengkua aro uamang ia commission-o kamko ka·na ku·rachakahaon Commission-ko songgnok.
Meghalaya a·doko Education Commission-ko songna gita re·anggipa bilsion a·dokni Cabinet ra·chakangahachim ine nikna man·a.
Koborko on·ani gitade, ia commission-ni membor-rangko seokmanahaon, bon·kame tom·aniko ong·atenba, ua Commission-ni bidingo u·iataniko on·gnok.
Ia commission-o sak 7-oni sak 10 membor-rang donggen aro iano skigiparang aro lekka porani a·bao u·i-ma·sigipa manderangko membor songgen ine kobor on·aha.
National Education Policy 2020-o pangchake, lekka porani gadango dingtanganiko ra·bana gita ia commission, dingtangmancha cholrangko sandie sorkarina ku·pattianirangko on·anggen.
Indake ong·engon, Meghalaya Public Service Commission (MPSC)-ni gita recruitment-ko dakanio ba kamo ka·anio somoirangko bang·e ra·rongani gimin sak 1000-mangni gita skigiparangko kamo ra·na gita dingtang bewalko a·dok sorkari jakkalna miksongenga ineba kobor on·timgiparang parakataha.
Bangbang ong·e dongenggipa skigiparangni kamrangko gapatna man·kujaskal, temporary teacher-rangko sal 59-ni gadango ra·anggen aro MTET pass ka·gimin skigiparangonikon ia temporary teacher-rangkoba rakkianggen ineba kobor on·aha.
