TURA: Batanggimin antignina skangan Meghalaya a·dok gimikni SSA skulrango skigiparangnan January aro February jagnini dormaharangko skigiparangni account-rangona chipattokahaoba, Selsella Block-ni ning·o donggipa SSA skigiparangde jagnini dormaharangko da·onan man·tokskakujaenga ine All Garo Hills SSA School Teachers Association (AGHSSASTA) parakataha.
AGHSSASTA-ni president LG Momin-ni parakatani gitade, Selsella block-ni ning·o donggipa SSA skigiparangni pilak nangchongmota lekkarangko on·atmanahaoba da·onan jagnini dormaharangko man·tokkujaenga indiba gipin a·ja aro block-ni ning·o donggipa SSA skigiparangde pilakan ia jagnini dormaharangko man·tokahachim.
Skigiparangna ia jagnini dormaharangko skigiparangni account-rango chipatkujaengani gimin AGHSSASTA-ni gita Shillong-o donggipa SEMAM-ni SPD-na badi ka·e sedoataha ineba Momin parakataha.
Indake ong·engon, dormaharangko on·na skang, Selsella Block-ni ning·o donggipa SSA skigiparangoniko sakprako gong 200/- ka·e, Block Mission Coordinator (BMC) aro accountant, gile ra·enga ineba AGHSSASTA matnangataha.
“Iani bidingo chinga gipin district aro block-rangoniko sing·sandie nion, SSA skigiparangoniko tangka gilna gita Education department-ni official-rang maming ge·etanirangko on·ani dongjani gimin gipin district aro block-rangode skigiparangoniko iandake tangka paisarangko gila dongja ine ma·sina man·aha. Indide maikai Education department-ni maming ge·etani gri Selsella Block-o iandake SSA skigiparangoniko BMC aro accountant, tangkarangko gile ra·enga?” ine AGHSSASTA-ni dilgiparang sing·doataha.
