TURA: North Garo Hills a·jao mongsongbatgipa rama, chong·motan Assam a·dokni Damra-oni a·bachenge Bajengdoba-o naegipa ramako tariani da·onan matchotkujaengani gimin North Garo Hills a·jani GSU, AYWO, AAYF, GSMC, AHAM, FAF, Public Joint Action Committee aro gipin dolrang, North Garo Hills a·jani Deputy Commissioner-na badi ka·doangenba, ia rama tarianiko ta·rakbatatchina didiataha.
NGO-rangni parakatani gitade, ia mongsonggipa ramako tariani matchotkujaengani a·selan re·ruraenggipa manderangnasan ong·aigija jolni manderangnaba neng·nikanirangko ra·baani gita ong·engachim.
“Ia ramako tarienggipa contractor-rang dongimin somoi gita matchotchina kamrangko nirokatskachina chinga nang·ko didienga. Ia ramako tarianio ja·manchakengani gimin contractor-rangkon dosi channa nanga aro somoi gita matchotjagenchimode uamangoniko daiko ra·skana nanga,” ine NGO-rang, North Garo Hills a·jani Deputy Commissioner-na sedoatgipa chittio janapataha.
NGO-rangni parakatani gitade, ia ramako ia 2023 bilsini May jaon matchotatna gita ia ramako tarienggipa contractor-rang ku·rachakaniko on·ahachim indiba da·o kamrangko nigenchimode May jani gisepo matchotna ka·donganirang dongkujaengachim.
