TURA: Job Reservation Policy-ni Roster system-ni bidingo manderangna talataniko on·na aro Tura-ko Winter Capital songchina dabiangkuna gita re·anggipa Mongolbar salo, East Garo Hills a·jani dingtang dingtang dolrang, jekai GSU, FAF, AIGU, WGCSU, WLCSU, WATA aro uandakgipa dingtang dingtang dolrang nangrimenba jinma tom·bimonganiko Williamnagar-o ong·atangaha aro ja·mano a·dokni Chief Minister Conrad K Sangma-na memorandum-ko East Khasi Hills a·jani Deputy Commissioner-ni jako on·atjolaha.
Roster system-ko ra·gatani bidingo Chief Minister-na sedoatengon, batanggimin somoirango nipilani gri roster system-ko mikkangchini giminsa tarigenchim ong·ode uan badiaba jatrangko mikkang niteani gita ong·gen ine NGO-rang parakataha.
Secretariat aro Directorate gita dakgipa office-rango A·chikrangde kam ka·giparang namen komibatenga ine janapatengon, MeECL gita dakgipa mitam department-ni head-rangode A·chikrang saksaba dongja ine Williamnagar-ni NGO-rang parakataha.
1972 bilsio ra·gatgipa job reservation policy-o pangchake, A·chikrangna 40% aro Khasi-Jaintia-rangna 40%-kon ja·rikangkuchina gitaba NGO-rang, Chief Minister-ko didiataha.
Lekka pora aro pilakni gitan A·chikrang, Khasi aro Jaintia-rangna bate chol dongjabatgipa ong·enga aro porikkarangko sena gitaba A·chikrang, Shillong-onasa re·ange sena nangenga ine janapatengon, ia pilakkon nigope, A·chikrangba apsan bak rengsiko man·pana gita Job Reservation Policy-ko ra·gatchenga somoionin roster system-ko ra·gatna nanga ine NGO-rang dabiangaha.
Meghalaya a·dokko man·chengaonin Tura-ko Winter Capital songna dilgiparangni gisepo songgigrikani dongachim ine janapatskaengon, Garo Hills-oba apsan daken namroro silroroaniko ra·bana man·na gita Tura-ko Winter ba Second Capital songchina Williamnagar-ni NGO-rang, Chief Minister-na gisik ra·ataniko on·angaha.
Roster system, Winter Capital-ni bidingo NGO-rang tom·aniko ong·ata
Date:
Share post:
