SHILLONG: Trinamool Congress (TMC)-ni MLA-rang, Bharatiya Janata Party (BJP) baksa bakrimna skaniko parakaha indiba somoi ong·ahaosa uamang napgenma napjawa ukode ma·sina man·aigen ine Budbar salo, a·dokni Cabinet Minister aro BJP-ni MLA AL Hek parakataha.
Hek-ni parakatani gitade, uni TMC MLA-rangko gronge agangrikon uamang BJP-o napna kusi ong·anikode paraktokaha indiba uamang somoi ong·ahaosa BJP-o napgenma napjawa ukode parakna tik ka·aha.
“Assembly-o anga TMC-ni MLA-rangko gronge BJP-o napchina aganon, uamang BJP-o napnade maming neng·nikani dongjawa indiba somoi ong·ahaosa uamang napgenma napjawa ukode ma·sigen ine aganaha,” ine Hek parakataha.
TMC-ni MLA-rangnasan ong·aigija BJP-ni do·gako Congress aro gipin dolrangnaba oe donaienga ineba Hek parakataha.
Songbad kingsao parakani gitade, re·anggipa February jao ong·atanggipa Assembly election-o chu·sokgipa ong·jahani gimin AITC-ni sakbri MLA-rangde BJP-o napskana tik ka·ahachim aro ia MLA-rangko, a·dokni gitcham chief minister aro AITC-ni MLA Dr Mukul Sangma an·tangan dakdilengachim.
Indake ong·genchimoba, AITC MLA-rangko nokchakjachina gita NPP-ni dilgipa aro a·dokni Chief Minister Conrad K Sangma ku·rang on·atani ja·man, AITC-ni MLA-rangko Assam-ni Chief Minister aro BJP-ni dilgipa Himanta Biswa Sarma champengatskaahachim.
AITC-ni MLA-rang, BJP-o napna miksonganirang donga inako Meghalaya AITC-ni president Charles Pyngrope aro parliamentary party-ni dilgipa Mukul Sangma-de jegalatskaahachim ine nikna man·a.
