SHILLONG: Agia-Medhipara-Phulbari-Tura (AMPT) ramako re·anggipa February jaosan taria matchotahaoba ia ramani km 9 ong·gipa bak da·on nosto ong·na a·bachengengaha ine badi ka·aniko man·ahani gimin ia ramani bakko niatchina gita Budbar salo, Meghalaya High Court, a·dok sorkarina ge·etaniko on·angaha.
High Court-o badi ka·doanggipa manderangni parakani gitade, AMPT ramao ia km 9 ong·gipa bakna agrede da·o gipin bakrangko namen tariengahachim.
AMPT ramao km 32-gipa bakoni km 41-gipaona gimik km 9-ni ramako ia 2023 bilsini February jao tarimanahachim indiba da·on ia ramao nosto ong·anirangko nikna man·engaha ine Meghalaya High Court-na badi ka·doangahachim.
“Ia rama da·on nosto ong·engaha ong·ode ian mikrakna nangani ong·engaha. Ia ramako February jani a·ran kario tariani ja·man da·o wachi sokna skangan nosto ong·engaha ong·ode namen ra·chakna man·gijani ong·enga,” ine Meghalaya High Court-ni Division Bench parakataha.
