TURA: Bristibar salo, National People’s Party (NPP) West Garo Hills unit-ni gita a·dokni Chief Minister Conrad K Sangma aro Assembly-ni Speaker Thomas A Sangma-na, Tura-ni District Auditorium-o mande ra·pilskaani program-ko ong·atangaha.
A·dokni Chief Minister aro Assembly-ni Speaker-na mande ra·pilskaani chin gita ia tom·anio, A·chikrangni ganding, pandra aro gipin boksisrang baksana citation-koba on·aha.
Ia tom·aniko ong·atanio a·dokni Chief Minister Conrad Sangma, ia program-ko ong·ate an·tangna mande ra·aniko on·ahani gimin NPP West Garo Hills unit-ko mittelpilangenba, ia bilsini election-oba uko seoktaiahani gimin South Tura constituency-ni manderangkoba mittelpilangaha.
“Angni skanggipa term-na South Tura-ni MLA ong·e kamko ka·anio angni ku·rachaka pilakkon anga chu·sokate on·aha aro da·o gnigipa changna angko seokahani gimin angni manderangna aro angni a·dokna angni niksamsoenggipa kamrangko chu·sokate on·angkuna anga ku·rachakenga,” ine a·dokni Chief Minister aro South Tura-ni MLA aganaha.
NPP-chi dilenggipa MDA sorkari, a·doko pilakni gitan namroro silroroaniko ra·bana kamko ka·angkugen ineba ua aganaha.
Ia 2023 bilsini Assembly election-o NPP, Garo Hills gimikni dam 24 seat-rangoni dam 18 seat-rangko chena man·aha aro ian manderangni NPP-na ka·saaniko aro NPP-o ka·donganiko mesokani ong·aha ineba Sangma aganaha.
Ia tom·bimonganiko ong·atanio Meghalaya Legislative Assembly-ni Speaker aro North Tura-ni MLA Thomas A Sangma-ba jinmana aganprakangengon, ia election-oba uko seoktaiahani gimin North Tura constituency-ni manderangko mittelpilangenba, Assembly-ni Speaker ong·e dilna gita uko seokahani gimin a·dokni Chief Minister-koba mittelpilangaha.
Assembly-ni mikkim rasongko rakkiangkuna gita ua an·tangko on·kange kam ka·angkugen ineba Sangma parakataha.
Ia program-ko ong·atanio dingtang dingtang dolrang, a·songna ring·mittelani gitrangko ring·e manderangko an·saoatangaha.
NPP, A·dokni CM aro Assembly Speaker-na mande ra·pilskaaniko daka
Date:
Share post:
