Rajasthan-o poraienggipa Ri Bhoi a·jani chatri saksa hostel-o sia

SHILLONG: Rajasthan a·dokni Mody University-o poraienggipa Ri Bhoi a·jani chatri saksa, re·anggipa Bristibar salo, ong·na kragija dake siaha ine kobor on·aha.
Koborko on·ani gitade, bilsi 19 ong·gipa Walinda Binong, Mody University-ni School of Design-o 1st year-ko poraiengachim indiba Bristibar salo, uni sigimin manggisiko uni dongchakenggipa hostel-oniko man·aha.
Walinda Binong-ara Ri Bhoi a·jao donggipa Nongagang Marngar-oni Rubi Binong aro Kobita Syiem-ni demechik ong·achim aro uni sianiko knasoe, uni nokdangsan ong·aigija songgimikan aiao inmantokbeahachim.
Koborko on·ani gitade, sianggipa Walinda Binong, re·anggipa bilsini October jaosan Mody University-ni School of Design-o admission ra·e, da·o 1st year-o poraiengachim aro ua ia institute-ni chalaienggipa me·chikrangni hostel-on dongengachim.
Ia bilsini March jao uni ma·gipa saani gimin ua noktangona re·baahachim indiba ua March-ni 20 tarikon uni poraienggipa biapona re·angpilahachim.
Ua pangnan uni nokdangni manderang baksa golpogrikrongoba maming duk ba neng·nikanirangko ua janapjahani gimin iandakgipa obostako knasona ka·dongani dongjachim ine nokdangni manderang parakattokaha.
Indake ong·genchimoba, re·anggipa April-ni 27 tariko, ia me·chikni poraienggipa institute-oni uni pagipa Ruby Binong-na phone ka·atenba, uni demechik saa bilongenga ine uko nokchi rimangpilchina aganataha ine kobor on·aha.
Ua salo, Guwahati-oni Jaipur-ona bon·kamgipa sildorengo ua tikitko man·jahani gimin uni pagipa, April 28 tarik pring 6:00 bajini flight-o bilange, ia chatrini poraienggipa institute-ona attamon sokangahachim. Ruby Binong-ni institute-ona sokangon, uni demechik dongjaha ine institute-ni mitam skigiparang una agansoaha aro uamangni pagipana aganani gitade, ua bisi ringani ja·man an·tangni dongchakenggipa hostel kututio kae siaha.
Uni manggisiko man·ani ja·man Rajasthan a·dokni Sikar Lakshammgarh-o donggipa community health centre-ona ra·angaha.
Indake ong·engon, ia institute-ni agananiko me·chikni pagipa jegalatskaenba, uni demechik maming dakeba an·tangko so·ote sijawa ine aganskaaha.
An·tangni demechikko unbaksa hostel-o apsan dongpaenggipa gipin chatro chatrirangsa so·ote galna nanga ine ua chanchichipengani gimin Ruby Binong aro uni nokdang, iani bidingo police-rangna badi ka·doangaha aro ia case-ko Rajasthan a·dokni police-rangan jako ra·e sandirokna a·bachengataha ine kobor on·aha.