SHILLONG: Manipur-oniko sak 100-na baten poraigipa chatro-chatrirangko rimongkatbaaha aro Shillong-ona sokbaaha aro dolgipin sak 40 ba sak 50-mang ru·utgija salgni gisepon sokbagen, sorkari pilak jachange donggipa chatro-chatrirangko rimbapilna kamko ka·enga ine Chief Minister Conrad K Sangma mijalo u·iataha.
Ua uni noko chanchirimaniko dakao ‘‘Sak 40 re·baaha dolgipin sak 40 da·alo re·bagen aro chinga sakantikon rim·bapilna da·alo man·a gita chinga jotton ka·enga,’’ ua u·iataha.
“Manipur-o poraienggipa chingni manderangna batanggimin salgnio neng·nikani a·selrangko chagrongengako chinga nikenga, Manipur sorkarirang, chatro-chatrirangko rimongkatna jotton ka·enga. Chinga sildoreng bolsako para ra·aha indiba neng·nikanirang donganichi chinga matchote rimongkatbana man·jaha chinga para salgipa sildorengrangko jakkalna gita nangaha,’’ ua aganaha.
“Ritchana banten sokbaaha aro chinga dolgipin sak 40 ba sak 50-mangko ru·utgijaan sokbaatgen,’’ chief minister aganaha.
Manipur-o salgro-salaramni gipin a·dokrangko niate Meghalaya-ni manderang aro poraigiparang bang·bate donggipa ong·naba donga aro uamangko rimongkatanirango adita somairangko nangkugen, chief minister aganaha.
“Sak bonga ba sak 10 manderangna agrede sakantinade seat-rangko re·baenga konta 48-72-o man·janaba donga chinga jedakeba poraigiparangko rimbapilna man·gen,” ua agandapaha.
NPP national party ong·e a·jolni gita nikanio Manipur-o party-ni pangchakani mangrakgipa ong·enga aro Manipur-o jachange donggipa poraigipa chatro-chatrirangko dakchakna man·enga, ua a·bachengao aganaha.
“Ia kamo ia bewalni dakchakaniko party-o ong·e chinga man·enga jeon a·songni gadango a·jolni gita nirokataniko man·enga aro a·jolni neng·nikanirangko daito ra·enga aro indake ian a·songni manderangni party da·alo ong·enga,’’ ua agandapaha.
