Shillong: Manipur-o golmal ong·engani gimin Meghalaya sorkari, Manipur-o jachange donggipa a·dokni manderangko rimbapilenga. Poraigiparang aro a·dokoni manderang, jemangan songtang-noktangona re·bana sikaniko parakataha, uamangko a·dokona rimbapilenga.
Bang·a chatro-chatrirang Manipur sorkarini dakchakatanio Imphal-oni Guwahati airport-ona sokbatokaha. Uandake a·dokni manderangko rimbapilna bolgni Indigo sildoreng, Alliance Air aro Air India-ni bolgni sildorengko manderangko salsurana wataha. Una agreba boldok garirangko Guwahati airport-o student aro gipinrangko Shillong aro Tura-ona salrurana donenga. Ministry of Home Affairs, GOI, iandakgipa neng·nikan somoio dakchakatpaenga.
Meghalaya sorkarioni sakgni officer-rangko Manipur-o jachange donggiparangko rimbapilna kam ka·anirangko nirokna gita aro Manipur sorkari baksa melie kamrangko nirokna ba ka·na watataha.
Imphal-ona watata man·gipa sakgni officer-rangara- East Khasi Hills-ni Additional Deputy Commissioner Peter Passah, aro Excise -ni Assistant Inspector John Danggo – uamang ong·a.
Adita sak chatro-chatrirang Meghalaya sorkarini watatgipa sildorengo tom·tomen noktangona sokbapilaha. Mikkangchiba sokbakugen.
Iarangni gisepon Meghalaya-oni saksa chatri jean golmal ong·gipa biaponi naljoke noktangona sokbagipa Miss Ajakchera G Momin, Manipur-o ong·enggipa obostani gimin parakangaha. Meghalaya Association-ni gita, uamang Meghalaya -ni a·gipi authority-na kobor on·atna man·aha, jeni a·sel uamang tom·tome sorkarini dakchakanichi noktangona sokbana man·aha.
Uandake sorkari, sokbakugijagiparangko rimbapilna kam ka·kuenga.
