TURA: Robibar salo, Tura-ni damgittam examination centre-rango National Eligibility-cum-Entrance Test (NEET)-ko ong·atangaha aro ia porikkako Garo Hills gimikni sak 712 chatro chatrirang sena gita cholrangko man·tokaha.
Ia NEET-ara MBBS, Dental (BDS) aro AYUSH (BAMS, BUMS, BHMS etc) gita dakgipa undergraduate medical course-rangko poraina sikenggipa chatro chatrirangna ong·atenggipa porikka ong·achim.
Indake ong·engon, ia NEET-ko re·anggipa bilsi dipet Tura-oba Don Bosco College-o a·bachengataha aro ia changode NEET-ko Don Bosco College, Capt William’s School aro Nokrek Heights School-oba seataha.
Robibar salo ia NEET-ko segipa sak 712 chatro chatrirangoni sak 400-de Don Bosco College-o, sak 144-de Capt William’s School-o aro sak 168-de Nokrek Heights School-o seaha.
NEET porikkani result-ko jasa ba sal 45-mangni gisepo parakrongachim.
