TURA: North Eastern Hill University (NEHU) Tura campus-ni Varsity Week manianiko Sombar sal dipet a·bachengataha aro ia manianiko NEHU Tura campus-ni Campus-in-Charge Prof Sujata Gurudev a·bachengate on·angaha.
Ia manianiko a·bachengatanio NEHU Tura campus-ni ning·o donggipa Council of Students’ Welfare-ni Chairperson Prof Fameline K Marak, dingtang dingtang department-ni dilgiparang, chatro chatrirang, skigiparang aro gipin kamrangko ka·gipa manderangba bakko ra·angtokaha.
Ia Varsity Week manianiko a·bachengatanio NEHU Tura campus-ni Campus-in-Charge Prof Gurudev, chatro chatrirangna aro gipinrangna aganprakangengon, ia manianio bakko ra·tokengani gimin chatro chatrirangko aro skigiparangko mittelpilangenba, ia Varsity Week maniani name chu·sokgipa ong·china an·tangni namgipa skaniko parakangaha.
Ia Varsity Week manianiko dingtangmancha chatro chatrirang, dingtang dingtang jatni ganding chindingrangko gane, Academic Block II-oni Arabella Hostel Junction-ona re·jomanichi a·bachengataha, jeon chatro chatrirang gitrangko ring·e chrok mesae bakko ra·angtokaha.
Re·joma matchotani ja·man, Council of Students’ Welfare-ni Chairperson-ba jinmana kan·dike aganprakangaha aro uni ja·man joljol house captain-rang ku·mikchetaniko dakangaha.
Ia Varsity Week-ni skanggipa salo, cricket, budu salgrikani aro jatni dingtang dingtang kal·susaanirangkoba ong·atangaha.
Ia NEHU Tura campus-ni Varsity Week manianiko re·baenggipa May 13 tariko matchotatgen.
