SHILLONG: May-ni 10 tariko ong·atenggipa Sohiong Assembly election-na skang MDA sorkario bakrimenggipa United Democratic Party (UDP) aro National People’s Party (NPP) dolni gisepo matnanggrikanirang batroroengon, dolgnini gisepo matnanggrikanirang simana badeanggenchimode uan manderangni nikanio nitogijani aro dolgnini bakrimanioba nangchakeaniko ra·bagen ine NPP-ni Minister aro MDA-ni ku·wattimgipa Ampareen Lyngdoh mikrakataniko on·angaha.
NPP-chi dilenggipa MDA 2.0 sorkarioniko UDP-ko ra·galani giminde ua mamingkoba aganna gita jechakskaaha.
“Iani bidingo anga mamingkoba agansamsona sikja aro anga saksa u·i-ma·sigipa mandeba ong·ja,” ine Lyngdoh aganaha.
“Chinga apsan sorkarini bak ong·eba iandakgipa obostako chagrongna nangenganiara namen kragijani ong·a. Bang·a election-rangon UDP, NPP-ko man·chape apsan bakrimska dolrang baksa iandake matnanggrikanirangko dakronga,” ine Lyngdoh parakataha.
Apsan bakrimgipa dolrang ong·e nangana bate matnanggrikgenchimode ian manderangni nikanio nitogijaniko aro apsan bakrimanikoba nangchakaniona ra·bagen ine ua talataniko on·angaha.
Iandake matnanggrikanio ua an·tangde jak on·pana skani dongja ine janapatengon, ia Sohiong election-o ua NPP-ni candidate-ko chegipa ong·atna raken kamko ka·enga ine Lyngdoh parakatskaaha.
Sohiong election-o NPP aro UDP dolrangni matnanggrikenggipani bidingo janapatengon, matnanggrikani aro election-rangara apsan bak gitan ong·aia maina matnanggrikanide election dongjawa ine NPP-ni MLA parakataha.
“Election matchotahaode gipin bang·bea kamrangko an·ching nikskana man·gnok. Chinga a·dokni dilgiparang ong·e, mikkangchi a·dokko namao dilangna aro bilsi bongana namgipa biterangko on·na gita kamrangko ka·anggen,” ine Lyngdoh aganaha.
