SHILLONG: Batanggimin saldokni gisepo, Manipur a·dokoni gimik sak 242 Meghalaya a·dokni manderang biaptangtangona sokbapilaha ine Mongolbar salo, a·dokni Cabinet Minister aro MDA sorkarini ku·wattimgipa Ampareen Lyngdoh parakataha.
Manipur a·dokoni re·bapilgipa manderangara, Central Agriculture University, RIMS, Manipur University aro kal·susaanirango bakko ra·na re·anggipa manderangko man·chape Manipur-o poraienggipa chatro chatrirangni ma·drangrang aro gipinrangba donga ine Lyngdoh parakataha.
Ia chatro chatrirangoni mitamde so·sojengjeng ong·gipa biaprango donggiparangan ong·achim ine janapatengon, a·dokni manderangko rimongkatbaanio Army-rangsa mongsonggipa kamrangko ka·aha ine Lyngdoh parakataha.
“Manipur a·doko jachange dongna nangenggipa Meghalaya a·dokni manderangko rimongkatbana chinga army aro ma·mongni gipin sipai dolrang baksa agangrikaha aro uamang an·chingni chatro chatrirangko rimongkatbana gita dakchakanirangko on·aha,” ine ua aganaha.
Lyngdoh-ni parakatani gitade, Manipur a·doko jachange dongenggipa a·dokni manderangko rimongkatbaaniara uamangni skani gitasa ong·aha aro a·dokona re·bapilna sikenggipa manderangnade uamang register ka·chengna gita cholrangko on·aha.
“May-ni 5 tariko chinga India sorkarioniko special flight-ko man·aha aro skanggipa salon sak 67 chatro chatrirangkode rimongkatbaaha. Uni ja·man chatro chatrirang internet-rangko man·jahani gimin chinga commercial airline-rang baksa agangrike chatro chatrirangna tikitrangko book ka·anio dakchake on·aha,” ine a·dokni Cabinet Minister parakataha.
A·dokni chatro chatrirangko tom·tomao sokbapilatna man·ahani gimin ua dingtangmancha army aro Assam rifles-koba mittelpilataha.
