SHILLONG: Meghalaya a·doko niam gri chalaienggipa coke karkana ba koela so·gipa karkanarangko chipna man·kujaengani gimin aro ia karkanarangni nokgiparangko rim·kujaengani gimin Meghalaya High Court, a·dok sorkariko sing·doatenba, ia niam gri chalaienggipa karkanarangko ta·raken chipatchina ge·etaniko on·angtaiaha.
Mongolbar salo, saksa Shailendra Kumar Sharma-ni file ka·gipa PIL-ni bidingo hearing-ko dakangengon, ia koela so·ani karkanarangko niam gri chalaienggipa manderangni bimingrangko bimingchina aro uamangko niamo pangchake rim·na gita ja·kurangko de·china High Court-ni full bench, a·dok sorkarina ge·etaniko on·angaha.
Iani bidingo June 8 tariko hearing-ko daktaina somoiko donangengon, da·o changgipin hearing dakani somoiode ia niam gri chalaienggipa karkanarangko dongjachina gita High Court, Justice BP Katakey-na ge·etaniko on·angaha.
Meghalaya a·doko niam gri koela bikotaniko National Green Tribunal (NGT) aro Supreme Court champengatani ja·manoba 2016 bilsionin niamrangko pe·engani gimin changni chang mikrakatanirangko on·ahachim ine janapatengon, “A·doko niam gri koela bikotaniko champengchina a·dokna aro Chief Secretary-na ge·etaniko on·ahaoba iandakgipa karkanarangko chalaikuna man·enga ine nikenba da·o iandakgipa karkanarangko chipchina ge·etaniko on·enga. A·doko iandake niam gri chalaienggipa karkanarangko a·dok sorkari nirokani pal a·dokni manderangsa kacharina u·iatenga,” ine High Court parakataha.
