TURA: Mongolbar walo, North Garo Hills a·jani police-rang, Tura-oni sam badinggipa mande sakgittamko pekatgipa samrang baksa rim·na man·aha.
Police-rangni u·iatani gitade, sam badinggipa manderang, pekatgipa samrang baksa Assam a·doko donggipa Krishnai-chipakni West Garo Hills a·jachipakna re·baenga ine kobor man·soani ja·man, Bajengdoba gita re·ruraenggipa gari aro manderangko nirikkisoaha aro uandaken skanggipao Mongolbar walni 8:30 bajimango mande saksaoniko gram 5.69 ong·gipa heroin samrangko man·aha. Rim·ako man·gipa mandeara Tura Balading-oni Sreitusha Ricardo Ch Sangma ong·achim ineba police-rang u·iataha.
Uni ja·man, apsan walon walni 10:00 bajimango, apsan police dolan, mande sakgniko, motorcycle-o re·baengmitingko Bajengdoba-o rim·sona man·taiaha ine kobor on·aha.
Ia mande sakgnionikoba police-rang, gram 3.13 ong·gipa heroin samrangko man·aha ine kobor on·aha.
Rim·ako man·gipa mande sakgniara, Edenbari Masumata gittimoni Chuang Ch Marak aro Tura Cherangre-oni Ricky Ch Momin ong·achim.
