U·IATTIMGIPAONI
SHILLONG: Darang political dolni dilgiparangko miksonge matnanga dongja indiba nangchongmotgipa kamrangni giminsa mesoke on·ani ong·aia ine Sukrobar salo, United Democratic Party (UDP) talataniko on·angaha.
“MDA-o bakrimenggipa dolrangoni darangkoba chinga miksongmanchae matnanganirang dongja maina chinga apsan bakrimenggipa dolrang baksa meli nangrime donganiko bebera·giparang ong·a. Indiba dingtang dingtang constituency-ni gadangode dolsa dolgipinni kosako matnanggrikanirang dongaiani gimin chingaba apsan ja·kurangko de·na nangao ga·akaia,” ine UDP-ni general secretary Jemino Mawthoh aganaha.
MDA sorkario bak ong·genchimoba mitam political dolrang, election-rang sokbahaon, NPP-ni kosako kragija dake matnanganirangko dakronga ine adita salrangna skangsan a·dokni Chief Minister aro NPP-ni national president Conrad K Sangma aganahachim ine nikna man·a.
Iandake matnanganirangara uko gisik saatasan ong·aigija ian a·doko songdongenggipa manderangni nikanio nitogijani ong·a ineba ua aganahachim.
Indake ong·engon, nangrime sorkariko chalaianiode dingtang dingtang dolrangni gisepo chanchianirang dingtanggrikaia aro badiaba somoirangode dolsa dolgipinni kosako matnanggrikaniona sokaia ine UDP-ni general secretary talataniko on·angaha.
“Meghalaya a·doko chang 11 Assembly election-rangko ong·ataha indiba 1972 bilsiosan APHLC dol, dam 32 seat-rangko chee doltangari sorkariko rikna man·aiaha. Una agrede darangan dolrangan iandake seat-rangko chegope sorkariko rikna man·a dongkuja. Uni gimin iandake darang dolan seat-rangko chegopna man·jahaode dingtang dingtang dolrang nangrimesa sorkariko rikna nangao ga·aka,” ine Mawthoh aganaha.
Election-rango matnanggrikanirangara election-o aganprakanirangsan ong·aia ine Deputy Chief Minister aro NPP-ni dilgipa Sniawbhalang Dhar-ni agangipa kattarangni gimin janapatengon, “Chinga (UDP), Chief Minister Conrad Sangma ba deputy CM Prestone Tynsong ba Deputy CM Sniawbhalang Dhar-ni kosako matnanganirang dongkuja. Indiba chinga nangani kri aganchakanirangko on·ronga. Chinga nangchongmotgipa kamrangna ku·rangko on·ronga indiba apsan bakrimenggipa dolni dilgiparangko maming saloba matnangjawa,” ine UDP-ni general secretary parakataha.