U·IATTIMGIPAONI
TURA: Ia 2023 bilsini MCS Preliminary Examination-na Coaching Class-ko Tura-ni Don Bosco College-o ong·atenga aro ia Coaching Class-ko Sukrobar salo, West Garo Hills a·jani Deputy Commissioner Jagdish Chelani, a·bachengate on·angaha.
Ia Coaching class-ko a·bachengatanio, West Garo Hills a·jani Deputy Commissioner, chatro chatrirangna aganprakengon, ia coaching program-o Science, English aro gipin subject-rang baksana chatro chatrirangni changa sapanirangko namdapatna gitaba skie on·anggen ine parakataha. Chatro chatrirangni namgnina ia coaching program-ko ong·atna pilak nanga dakchakanirangko on·engani gimin ua Don Bosco College-ni Principal Fr Bivan Rodriques-koba mittelpilangaha.
Ia tom·anio Additional Deputy Commissioner aro District Planning Officer WRG Momin-ba aganprakengon, da·o dipet Tura-o coaching centre-rang dongkujaengani gimin an·tangni suk ong·gijaniko parakatenba, jolni chadamberangna iandakgipa program-rangko ong·atjringchina didiangaha.
Porikkana on·gipa somoirang bakkandika ine talataniko on·angengon, MCS porikkako sena gita an·tangtangko tarisoanio namen gisik nanggiparang ong·china aro rake kamko ka·china gita Momin, chatro chatrirangko didiangaha.
Ia tom·anio dongpae chatro chatrirangna aganprakanggipa gipin manderangara, Don Bosco College-ni Principal Fr Bivan Rodriques Mukhim, Tura-ni Research Officer Bonelia R Marak aro gipinrang ong·a.