U·IATTIMGIPAONI
TURA: Sukrobar salo, West Garo Hills District School Education Office-ni gita Secondary skulni chatro chatrirangna, District Level Science, Mathematics aro Environment Exhibition-ko Tura-ni Dakkopgre-o donggipa SMELC building-o ong·atangaha.
Ia Exhibition-ko ong·atanio West Garo Hills a·jani Additional Deputy Commissioner (ADC) Education in-charge WRG Momin, mongsonggipa sokgipa ong·e jinmana aganprakengon, ia exhibition-o dingtang dingtang project-rangko dake mesokanian chatro chatrirangni Science subject-rango aro technology-o gisik nanganiko mesokani ong·enga ine parakataha.
Technology-ara pangnan science-o nangchakegipa aro mandeni salanti janggi tanganio dakgipa kamrangba science-o nangchakegipa ong·a ine janapatengon, jensalo an·ching bichongko ma·sia unon uko an·ching altua bewalo dake ma·sina man·a ine Momin parakataha.
Mikkangchi dal·dalgipa manderang ong·angna gita pangnan dal·e jumang nikchina aro chanchigiparang ong·china gitaba ua chatro chatrirangko didiangaha.
Ia exhibition-ko ong·atani bidingo District School Education Officer RTK Sangma, talate on·angskaengon, science, mathematics aro environment-ko gipatna mangmangsande iandakgipa program-rangko ong·atenga ong·ja indiba chatro chatrirangni changa sapanirangko sandina aro didina gitaba ong·atenga ine parakataha.
Iandakgipa program-rangko Department of Science, Mathematics aro NCERT-ni dilanichisa ong·atenga ineba ua parakataha.
Ia exhibition-o Selsella, Dadenggre aro dingtang dingtang biaprangoni gimik dam 15 skulrang bakko ra·aha ineba officer parakataha.
Ia exhibition-ko ong·atanio dongpae jinmana aganprakanggipa gipin manderangara, Tura-ni Sub-Divisional School Education Officer Samuel Ch Marak aro gipinrang ong·a.