SHILLONG: State Reservation Policy-ko gital dake nipiltaichina aro roster system-ko ra·gatkujaskal kamo ra·aniko dontongkuchina dabiani bidingo a·dok sorkari, maming aganchakanirangko on·kujaengani gimin Voice of the People’s Party (VPP), Budbar salo, Additional Secretariat sambao donggipa parking lot-o asonge jingjengatangna tik ka·aha.
A·doko roster system-ko ra·gatkujaskal pilak department-rangon kam on·aniko dontongkuchina aro state reservation policy-ko gital dake nipiltaichina dabie VPP-ni dilgiparang, re·anggipa Sukrobar salon konta 48 somoiko a·dok sorkarina on·angahachim ine nikna man·a.
Indake ong·engon, konta 48 somoiko on·ani ja·manoba a·dok sorkari, maming aganchakanirangko on·jahani gimin VPP-ni dilgiparang, Budbar salo asonge jingjengatna gita tik ka·angaha aro ia jingjengatanio bakko ra·echina gita VPP-na kam ka·enggipa manderangko aro jolo songdongenggipa manderangkoba didiataha.
Iani bidingo talataniko on·angengon, NPP-chi dilenggipa MDA sorkari, reservation policy-ko gital dake taripiltaiani aro roster system-ni bidingo maming aganchakanirangko on·na gisik nangjaengani gimin uamang, sorkarini kosako jingjengatanirangko dakna tik ka·aha ine VPP-ni ku·wattimgipa Batskhem Myrboh parakataha.
Iani ja·manba uamang dingtang dingtang dake jingjengatanirangko dakangkuani cholrang donga aro iani bidingo uamang ja·mano jinmana parakatgen ineba Myrboh parakataha.
A·doko koelarangko bikottaina gita NPP-chi dilenggipa MDA 2.0 sorkarini kamnaba VPP suk ong·gijaniko parakataha aro ia sorkarini ning·o man·e cha·giparangsa man·e cha·bataigen aro kangalrangde kangalsa ong·bataigen ine matnangataha.
A·doko koelarangko bikotna gita MDA sorkari, sorkari baksa nangrimgipa manderangnasa mikkang nitee licence-rangko on·na jotton ka·enga ineba VPP-ni ku·wattimgipa matnangataha.
