SHILLONG: Meghalaya Democratic Alliance (MDA) 2.0 sorkario bakrimenggipa MLA-rangna roster system-ni bidingo mesoke aro talate on·na gita Bristibar salo dingtangmancha tom·aniko Shillong songjinmani Secretariat Yojana Bhawan-o ong·atangaha.
Ia tom·a matchotani ja·man, kobor ra·timgipa manderangna talataniko on·angengon, roster system-ara badiaba jatna namgniko on·na ra·gatenggipa ong·ja indiba reservation policy-ko kakket aro bebeo ja·rikna ra·gatenggipasa ong·a ine a·dokni Chief Minister Conrad K Sangma parakataha.
Roster system-ara A·chikrangnasa namgni ong·batgen ine chanchichiptokenganiko jegalatengon, a·doko reservation policy-ko ja·rikna gita roster system-ko donna nangchongmota aro ia roster system-ko skanggipa salonin donna gita nangachim ine Chief Minister parakataha.
Ia roster system-ara badiaba jatna miksonge dongimin kamko ua jatnan tikatna gita cholko on·gipa ong·a ine talataniko on·angengon, ia tom·anio bang·a MLA-rangon sing·anirang ong·kataha aro uamangna sorkari talatanirangko on·angaha ine Sangma parakataha.
Roster system-ara ma·sie ra·anio namen rakbegipa ong·a ine janapatengon, Sukrobar saloba a·dok sorkari, pilak political dolrang baksa tom·e ia roster system-ni bidingo talate on·anggen ine Chief Minister parakataha.
Ia roster system-ni ning·o maikai kamrangko ka·genchim, uarangni bidingo a·dok sorkari, dingtang dingtang dolrangna, toromni dilgiparangna aro songko nokko dilenggiparangnaba talate on·na siengachim.
Roster system gri reservation policy-ko ja·rikaniara maming orto dongja ine janapatengon, ian reservation policy-ko kakket aro bebeo chu·sokatna ra·gatgipa scheme ba kam gita ong·skaenga ine Chief Minister parakataha.
Da·o dipet a·dok sorkari, reservation policy-ko nipitaiani giminde chanchirimkujawa indiba roster system-ko ra·gatani kamrangkon matchotatchengna jotton ka·gen ineba Sangma talataniko on·angaha.
MDA sorkario bakrimenggipa MLA-rangna Roster system-ni bidingo mesoke on·a
Date:
Share post:
