TURA: Garo Hills-o bading chiwale cha·na gita Tribal ong·gijagipa manderangna kajina bariataniko Tura-ni MDC Bernard N Marak jegalatenba, da·o dipet ia gital rate-ko Meghalaya a·dokni Governor ra·chakkujaengani gimin ian niamni a·palo ong·enga ine parakataha.
Garo Hills Autonomous District Council (GHADC)-o Trading by Non-Tribal (TNT) licence-na skango gipin jatrangni gamgipa kajinako adita salrangna skangsan changgnimangni gita bariatahachim ine nikna man·a.
“Tribal ong·gijagipa manderangoniko TNT-ni bimingo iandake kajina bariate GHADC-ni gilaniko anga raken jegalenga. Ia gital rate-ko da·o dipet a·dokni Governor ra·chakkujani gimin ian Garo Hills-o songdongenggipa Non-Tribal-rangoniko niam gri gile ra·a gita ong·enga. Ia gital kajinako ra·na skang, Governor ra·chakchengna nanggen,” ine Marak parakataha.
Tura MDC-ni parakatani gitade, iandake niam gri gipin jatrangoniko kajina bariate gile ra·engani gimin ua GHADC-ni chief executive membor aro Taxation-ni EM-naba sedoatahachim indiba uamang maming ja·kurangko de·kujaenga.
“Ia gital kajinako gitcham executive committee-sa ra·baaha ine uamang aganchakaha indiba ia gital rate-ko ra·chakama ra·chakkuja uni giminde talataniko on·jaha. Uni giminsa anga iako jegalenga maina nangana bate bading chiwale cha·gipa manderangoniko gile ra·aniara niamni a·palo ong·a. Iako Tribal ba Non-Tribal darangonikoba ra·na bil dongja,” ine Marak parakataha.