SHILLONG: Roster system-ni bidingo agan-talate aro mesoke on·na gita Sukrobar salo, dingtang dingtang political dolrang baksa a·dok sorkari, Shillong songjinmani Secretariat Yojana Bhawan-o tom·aniko ong·atangaha.
Ia tom·anio a·doko donggipa dingtang dingtang political dolrang, chong·motan National People’s Party (NPP), United Democratic Party (UDP), Bharatiya Janata Party (BJP), Congress, Trinamool Congress (TMC), Hill State People’s Democratic Party (HSPDP), People’s Democratic Front (PDF), Khun Hynniewtrep National Awakening Movement (KHNAM) aro uandakgipa political dolrang bakko ra·angtokaha indiba Voice of the People’s Party (VPP)-ni dilgiparangde sorkarini aganchakanio kusi ong·jae, tom·aoni ong·kate katpiltokaha.
Ia tom·aniko ong·atani bidingo a·dokni Chief Minister Conrad K Sangma, kobor ra·timgiparangna talate on·angengon, ia tom·anio pilak dolrangan an·tangtangni ma·sina skanirangko sing·e ra·aha aro sorkarina agan-ku·pattianirangkoba on·aha ine parakataha.
Dingtang dingtang political dolrangni ku·pattianio pangchake, roster system-ni bidingo ma·sikujaenggiparangna agan-talate on·na gita sorkari, Cabinet Minister Ampareen Lyngdoh-ni dilanichi committee-ko songna tik ka·angaha aro ia committee, sorkarina report-ko on·pilkujaskal, gital kamrangna advertisement ba u·iatanirangko dontongchengna gita sorkari tik ka·angaha ineba Chief Minister parakataha.
Chief Minister-ni parakatani gitade, ia committee-o dingtang dingtang political dolni membor-rangba bak ong·gen.
Ia tom·anio dingtang dingtang political dolrangna talate on·anggipani bidingo janapatengon, roster system-ara kamna seokanio ja·rikna dongimin niamsan ong·aigen aro ian lekka porani kamrangnade maming nangchakeani dongjawa ine Chief Minister parakataha.
“Reservation policy-ko 1972 bilsio ra·gatchengaonin ia niamo pangchake kam ka·giparangko rakkiaha aro iakon ja·riken da·aloba ia roster system-ko donangkugen,” ine Sangma aganaha.
