Roster System darangnaba gimaaniko ra·bajwa: BJP

SHILLONG: A·doko Roster System-ko ra·gatna chanchienggipani bidingo agangrikaniko dakna gita chanchirimaniko dakna party gimikko okame chanchidilaniko dakdilani ja·mano, A·dok BJP uamangni namnikpaaniko parakaha.
Koborni manderangna parakengon, Roster System-ni gimin party-ni gita chanchidilaniko dakna committee chairman dake songako man·gipa BJP dilgipa,  HM Shangpliang indake aganaha je, a·doko ra·gatnasienggipa Roster System, kam sandienggipa a·dokni chadamberangna namgni ong·gen.
“Gipin gipin party-rangni agana gita, chinga pilakan ia roster system-ko namnikpaa,” Shangpliang aganaha.
Party gimikni tom·aniko ong·atani somoio, pilak political party-rangan party-tangtangni nangnikanirangko agantokaha aro jajaanirangkoba talgrike ra·tokaha aro ia roster system, darangnaba gimaaniko ra·bajawa ine BJP nikaha ineba u aganaha.
Roster system-ko ra·chakjana kingkingde bangbang dongenggipa post-rangna Sorkari, advertise ka·kujawa, ia roster system chadamberangna kam man·na gita ramako nambatatgen, BJP dilgipa aganaha.
“Chinga, Committee tom·ataniko nichake dongenga,” ua aganaha.
Indake ong·genchimoba, Reservation Policy-ko nipilani giminde party, mamingkoba aganjaha indiba uko nipila nipilgijani gimin chanchina gitade Sorkarisa nambatgipa bimang ong·a ine Shangpliang aganaha.
Roster System-ko Congress-ba namnikpaa
Roster System-ni bidingo Sorkarini talate on·ako man·ani ja·man, Indian national Congress (INC), RS-ko ra·gatako namnikpaaha.
“High Court-ni ge·etanio pangchake ia roster system-ko namedake tik ong·e ja·rikna chinga kusi ong·bea” ine mijalo party gimikni tom·aniko ong·atani ja·mano Congress Legislature Party (CLP) dilgipa Ronnie V Lyngdoh parakaha.
“RS-ko ra·gatanio darang jatnaba mikkang niani dongjawa ine chingna ka·dongataniko on·ani ja·man ma·sisretanirang chingo dongjaha aro chinga kusi ong·beaha, maina Indian national Congress, chadamberangni namgninan kamrangko ka·gipa ong·a aro ia system-o chadamberangna ka·dongna man·aniko on·na nanga,” Lyngdoh aganaha.
RS-ko ra·gatanio darangnaba mikkang niani dongjawa, a·dokni reservation policy-ko ra·gatbaa intalan ia RS-ko ja·rikkujani giminsa Reservation policy-ni gita ja·riknasa iako ra·gatenga ine chief minister talate on·aha ineba ua aganaha.
“An·ching jeko tik ka·oba apale niksamsoe kam ka·na nanga, dikdiksana choliaigipana rikna nangja, ong·jaoba re·baenggipa chasongo neng·nikaniko man·gen,” Congress Legislature Party (CLP) dilgipa Ronnie V. Lyngdoh mija Butbaro aganahachim.
Unomitingo, ia rakbegipa a·bakuna chanchina gita party gimikko okame tom·atani giminba ua Chief Minister Conrad K. Sangma-ko mittelaha.
“Jeko tik ka·oba an·ching pilaknan namgniko tik ka·na nanggen,” ua agandapaha.