SHILLONG: Roster system aro job reservation policy-ko ra·e, re·baenggipa district councils election-na politics kal·soengani gimin National People’s Party (NPP), VPP-ni kosako matnange aganaha.
“Re·baenggipa district council election-rangna VPP, dongnue an·tangtangni namgnina politics kal·soenga, jegita pindapna jotton ka·genoba politician-rangde politician-an ong·aigen” ine Rajya Sabha MP aro NPP State president Dr WR Kharlukhi Sonibaro aganaha.
Roster system-ni bidingo apsan chanchirimaniko dakna gita Sukrobar salo chief minister Conrad Sangmani pilak party-rangko okame tom·dilaoni VPP ong·kate katahachim, aro May 23 tarikoni ari gri okumu chake jingjengatgen inenba parakatskaahachim. Unomitingo VPP namnikjaoba, TMC aro BJP, uandake Congress-de, party gimikni tom·anio roster system-ni bidingo Sorkarini talate on·aniko namniktokaiaha.
Roster system-ni bidingo party gimikni tom·ani aro VPP-ni ong·kate katani bidingo aganengon, “Tom·aniona pilak political party-ni president aro general secretary-ko okamaha indiba uamangni president-de ramao chrik-a·bokari tom·anionade re·bajaha,” Kharlukhi aganaha.
“Ua daito ra·manchagipa ong·ode party-ni president aro general secretary-kosa okamani gimin tom·aniona re·bana nangachim indiba gipin party-rangni president secretary-rang re·baoba VPP president-de an·tang re·bagija gipinrangko watatskaaha,” ua agandapaha.
“Reservation policy-ko Article 16 clause 4-ni ning·o songsalni bilgrigipa jatrangna tariaha ine anga uamangni member-rangni mikkango aganaha ineba” ineba NPP dilgipa aganaha.
“Constitution-ni badigipa bako mande jelanio pangchake reservation-ko taria ine angni uamango sing·aha aro uamang maikobade aganchakgenkon ine anga ka·dongachim, maina VPP-ni adviser-ko anga u·ija, uamang pilakn seng·giparang ong·a, indiba angni sing·anina aganchakani pal uamang, tom·aoni ong·katesa katangaha,” Kharlukhi aganaha.
MP aro MLA-rang, constitution-o bebera·e aro pangchakesa ku·mikchetaniko daka ine aganengon, “uamangni MLA-ba uko ma·siesa ku·mikchetaniko dakenggen ine anga ka·donga, unigimin Indiani constitution-osa pangchake dabianiko dakgen ine ka·dongsoenga,” NPP dilgipa aganaha.
