SHILLONG: Shillong Medical College-ko a·bachengatna gita dingtang dingtang kamrangchi jotton ka·engoba da·onan ia college-ko rikchakatna man·kujaenga.
Meghalaya a·dokoba medical college-rangko kulina gita 2010-11 bilsirangon chanchianirang ong·kate kamrangko a·bachengahachim indiba da·o bilsi 10 batpilengahaoba Shillong Medical College-de lekkaosan ong·kuengpiti aro Tura Medical College-ko matchotna gita ru·uta somoirangko nangkuaigen ine kobor on·aha.
Tura medical college-ni civil work-rangko mikkang bilsini June-July jarango matchotna ka·dongenga.
NEIGRIHMS-o rikenggipa Regional Cancer Centre, Medical College aro Nursing College-ko 2017-18 bilsirangosa a·bachengatahaoba da·o kamrang matchotangpilengaha indiba Shillong aro Tura medical college-rangkode indita bilsirangna skangan a·bachengatahaoba da·onan maming kamrang ong·skakujaengachim.
Shillong Medical College-na pangchakaniko Jhalupara-o donggipa Reid Chest (TB) Hospital-o songahachim indiba ja·mano sorkari, ia college aro hospital-ko Umsawli-ona apjitatskana tik ka·aha. Ia Shillong Medical College-ko rikna aro chalaina tik ka·gipa Kolkata-ni Kali Pradip Chaudhuri (KPC) baksa songgigrikanikoba ja·mano sorkari den·galpilaha.
Koborko on·ani gitade, da·o Shillong Medical College-ko New Shillong Township-o rikskana manchianirang dongenga.
Meghalaya a·doko mongsongbatgipa sanchakrangoni damsa NEIGRIHMS-ba Mawdiangdiang-on dongachim ine nikna man·a.
