SHILLONG: Robibar pringwalo, Shillong songjinmani Mawkhar Mission Compound-o donggipa Khasi Jaintia Presbyterian Higher Secondary School nokko bon·pile wa·al kamgopaha.
Kobor on·timgiparangni u·iatani gitade, ia skul nokko wa·al kamanio maming janggi gimaani aro saknaa man·ani giminde kobor dongjaha indiba ia skul nokko maikai wa·al kamchakatahachim name ma·sina man·kujaenga.
Ia skul nok bilsi 130 batpilahachim ine janapatengon, ia skul nokko wa·al kamani bidingo ning·tue sandirokanirangko dakchina sorkari ge·etaniko on·ataha ine kobor on·timgiparang parakataha.
Ia skul nokko wa·al kamani ja·man, a·dokni Chief Minister Conrad K Sangma-ba Robibar pringo, ia skul nokko nina re·angaha aro ia skul nokko rikpiltaina gita Chief Minister’s Special Development Fund-ni ning·o gong kror 1 tangkarangko on·atgen ine ku·rachakaniko on·angaha.
“Ia Khasi Jaintia Presbyterian Higher Secondary skul nokko wa·al kamanina anga namen ka·a be·a maina ia skulara bilsi 130 batpilahani gimin manderangna namen dingtangmanchagipa skul ong·achim. Ia skul nokko wa·al kamanichi jolo songdongenggipa manderangna namen noksan ong·atani gita ong·aha,” ine Sangma, ia skul nokko nieani ja·man parakataha.
Wa·al kama man·gipa skul nokko nieani somoio a·dokni Chief Minister, skulni chatrtirangko, skigiparangko aro skulni wilwilao donggipa manderangkoba grongjolbaaha.