Friday, December 8, 2023

Loyola College-ni farewell ceremony-o Edu Mins bak ra·a

Date:

Share post:

WILLIAMNAGAR: Mongolbar salo, East Garo Hills a·jani Williamnagar-o donggipa Loyola College-ni graduate ong·angenggipa chatro chatrirangna dingtangmancha Farewell Ceremony-ko ong·atangaha aro ia program-ko ong·atanio, a·dokni Education Minister Rakkam A Sangma, mongsonggipa sokgipa ong·e bakko ra·angaha.
Ia tom·anio a·dokni Education Minister, jinmana aganprakangengon, Garo Hills-o lekka porako tang·doatna gita rakbate poraichina aro kamtangtango bimchipgiparang ong·china gita chatro chatrirangko didiangaha.
Graduate ong·angenggipa chatro chatrirangna agan-ku·pattianirangko on·angengon, “Na·simang Loyola College-ko wate re·angenga ong·ja indiba ia college-ko an·tangtang baksa ra·bitangenga,” ine Loyola College-ni gunko pangnan ra·bitchina aro kamtangtango kakketgiparang, Isolna kengiparang aro sakgipinrangna dangdike on·skagiparang ong·china Sangma didiangaha.
Loyola College-o skigiparang aro kam ka·giparangna mittelpilaniko parakatskaengon, uamangni rakbee kamko ka·anichi ia college, lekka porani gadangko ra·dona man·aha aro Garo Hills-o ia college-ba niksengbatgipa college-rangoni damsa ong·aha ine Sangma parakataha.
Batanggimin bilsi 50-ni gisepo ia jolrangoni IAS officer ong·anggipa sakgnisankuengpiti ine an·tangni suk ong·gijaniko parakatengon, mikkangchi IAS officer aro dingtang dingtang chubata gadangni officer-rangko ong·katatna gita rakbate kamko ka·china ua, Loyola College aro college-oni graduate ong·anggipa chatro chatrirangko didiataha.
Ia program-o Loyola College-ni principal Fr Sunny Augustine-ba chatro chatrirangna aganprakengon, graduate ong·anggipa chatro chatrirangna an·tangni namgipa skaniko on·angenba, janggi tanga gimikan skie ra·giparang ong·e jatna aro a·songna dangdike on·giparang ong·angchina chatro chatrirangko didiangaha.
Ia farewell ceremony-ko ong·atanio dingtang dingtang department-rangoni nambatgipa chatro chatrirangna Education Minister-ni jakchi boksisrangko on·angaha aro boksisko man·gipa chatro chatrirangara, Commerce department-oni Anjuli S Marak, English-oni Tenmarchy M Sangma, Political Science-oni Necky Westha N Sangma, Education-oni Susie Susanti C Sangma, History-oni Giftsina M Sangma, Economics-oni Cheame S Momin aro Garo department-oni Tintin M Marak ong·a.

Related articles

IIM Shillong hosts training on procurement under World Bank financed projects

  Shillong, Dec 7: IIM Shillong, through its  Dr. APJ Abdul Kalam Centre for Policy Research and Analysis, organized...

Steps taken to impart primary education through tribal languages: Himanta

Guwahati, Dec 7: The Assam government is planning to impart primary education through the medium of tribal languages in...

Traffic arrangements for Me’gong Festival

    Tura, Dec 7: The West Garo Hills Police Department has notified of special arrangements for traffic including parking...

Simsang Festival on Dec 15 and 16  

Tura, Dec 7: East Garo Hills district administration will be organising a two-day Simsang Festival at Rongrenggre Government...