SHILLONG: Re·baenggipa 2024 bilsio ong·atna sienggipa Lok Sabha election-o National People’s Party (NPP), gipin political dolrang baksa bakrimgija doltangari susaaigen indiba ma·mongo BJP-ni dilenggipa NDA-ni bak ong·angkugen ine Sombar salo, NPP-ni national president aro Meghalaya a·dokni Chief Minister Conrad K Sangma parakataha.
Sangma-ni parakatani gitade, re·baenggipa bilsini Lok Sabha election-osan ong·aigija dingtang dingtang a·dokni Assembly election-rangoba NPP, doltangari susaangkuaigen.
Election-rango doltangari susagenoba NPP, pangnan BJP-chi dilenggipa NDA-ni bak ong·angkuaigen aro apsan daken a·dokoba gipin dolrang baksa bakrimangkugen ine Sangma parakataha.
Sombar salo, NPP-ni national committee tom·a matchotani ja·man kobor ra·timgipa manderang baksa agangrikengmiting somoio iako NPP-ni national president parakataha.
Lok Sabha election-o ma·ektee susana manchiengani gimin sing·anina aganchakaniko on·angengon, batanggimin pilak election-rangoba aro jagittamna skang ong·atanggipa Meghalaya Assembly election-oba NPP, gipin dolrang baksa bakrimani gri doltangarian susaaha indiba election-ni ja·mande, BJP, UDP aro uandakgipa dolrang baksa bakrime sorkariko rikaha ine Sangma parakataha.