TURA: Adita salrangna skang, South West Garo Hills a·jani ning·o donggipa Chattibui bazaar-o A·chik me·chik saksani a·ako Assam sorkarini todrae ra·na jotton ka·gipani bidingo A·chik Holistic Awakening Movement (AHAM)-ni dilgiparang, West Garo Hills a·jani Deputy Commissioner Jagdish Chelani-ko gronge badi ka·doangani ja·man, iani bidingo Deputy Commissioner an·tangan Assam sorkarina lekka sedoatna aro nanga gita ja·kurangko de·na ku·rachakaniko on·ataha.
AHAM South Western Zone Ampati-ni general secretary Wester G Sangma-ni u·iatani gitade, re·anggipa May 21 tariko, Indong Ch Sangma minggipa me·chik saksani Chattibui Bazar-o donggipa a·ako Assam High Court-o tol·e badi ka·enba, decree order-ko ra·bae, ia a·ako toani ja·man, ia bazar-o donggipa te 71 dokkanrangko pe·e galangaha. Ia obostani bidingo koborko man·soa bakan AHAM South Western Zone-ni membor-rang ua biapona re·bae, Assam police-rang baksa jegrikeaha indiba ua biapona Assam sorkari, CRPF aro dingtang dingtang sipai dolrangko watatahani a·sel uamang mamingkoba dakna man·jahachim.
“Assam High Court-ni on·atgipa lekkao seani gitade, Chattibui bazaar sambao donggipa bigha 2, khatta 4, lessa 11 ong·gipa a·ana Assam South Salmara-ni Mankachar police station-ni ning·o donggipa Dhaguri songoni saksa Akash Ali sagi, Shalibui-oni Shan Kumar Hajong sagini kosakosa Assam High Court-na badi ka·aha aro ia lekkao a·a nokgipa Indong Ch Sangma-ni giminde maming janapani dongskajachim,” ine AHAM SWZ Ampati-ni general secretary janapatenba, ian Garo Hills-ni a·ako ra·sekna Akash Ali aro Shan Kumar Hajong-ni gisepo golmal ong·anisan ong·aia ine parakataha.
Wester Sangma-ni parakatani gitade, maio pangchake kachario case-ko segataha ine Shan Kumar Hajong-ni depantegipao sing·on, uamang iana maming sakkirangko mesokna man·skajaha.
Indake ong·engon, iandake Garo Hills-ni a·arangko Assam a·doko songdongenggipa manderangni ra·sekna jotton ka·engani gimin Budbar salo, AHAM-ni dilgiparang, West Garo Hills a·jani Deputy Commissioner Jagdish Chelani-ko gronge agangrikeaha aro ua iani bidingo an·tangan Assam sorkarina sedoatna ku·rachakataha ine AHAM-ni dilgiparang parakataha.
Ia biapona Assam sorkarini manderang, a·arangko niam gri ra·sekna jotton ka·taigenchimode police dolrangko ua biapona watate nanga gita kamrangko ka·china ge·etanggen ineba Deputy Commissioner, AHAM-ni dilgiparangna ku·rachakaniko on·ataha.
M’laya-ni a·ako todrae ra·na jotton ka·gipani bidingo ja·kuko de·na DC ku·rachaka
Date:
Share post:
