TURA: West Garo Hills a·jani Selsella jolo da·o dipet SBI-ni branch damsamangmangsan dongkuengani a·sel jolo songdongenggipa manderang, bank-ni kamrangko ka·anio neng·nikanirangko chagrongna nangtokenga ine A·chik Students Welfare Association (ASWA) Selsella Administrative Board-ni president Harley N Sangma parakatenba, Selsella-o Meghalaya Rural Bank-ni branch damsako kulie on·china Shillong-o donggipa Meghalaya Rural Bank-ni Chief Manager-na sedoataha.
MRB-ni Chief Manager-na sedoatgipa chittio Sangma-ni parakatani gitade, Selsella jolo mande jelbra jelsuani da·o sak 30,000-mangni gita ong·aha aro ia jolo songdongenggipa manderangoni mitamrangde Meghalaya Rural Bank-ni customer-rangan ong·achim indiba da·o dipet Selsella jolo MRB-ni branch dongkujaengani a·sel ia manderang, kilometer 20-mang chel·ao donggipa Garobadha branch office-onasa aro mitamrangde una bate chel·batao donggipa Tura branch-rangonasa re·ange kamrangko ka·na nangtokengachim.
“Selsella jolrango bading chiwale cha·enggipa manderangba bang·en donga aro an·tangtangnade bading chiwalanioba cholipatokengachim. Indake ong·genchimoba, ia jolrango bading chiwale cha·giparangna chu·onga gita bank-rang dongjani a·selo bang·a neng·nikanirangko chagrongna nangtokenga. Kamrangko ka·e cha·enggipa manderangba an·tangtangni dormaharangko bank-rangko donna nangnikengachim indiba bank-rang chu·onga gita dongjani a·selan uamangba tangkarangko donna man·tokjaenga,” ine ASWA Selsella Administrative Board-ni president parakatenba, Selsella-o MRB-ni branch-ko kulina man·genchimode ATM-koba kulichina didijolataha.
Selsella-o Meghalaya Rural Bank-ni branch-ko kulina nangnikgenchimode uamang nok rikna a·ako ba nok parako sandie on·na man·aigen ineba Sangma parakataha.
