TURA: Batanggimin bilsirango Sohan D Shira sagichi dilengmiting somoirango Garo National Liberation Army (GNLA) bobil dol, bang·en ka·namgija kamrangchi manderangna so·sojengjeng ong·atanirangko ra·baahachim aro ua somoirango tom·tomanirang dongjae maming namroro silroroanirangkoba nikna man·jahachim.
Indake ong·genchimoba, GNLA bobil dolni commander-in-chief Sohan D Shira-ko so·ote galna man·ani ja·man, bobil dolni pilak manderangan an·tangtangko bame on·tokaha aro gipinrangba so·sojengjeng ong·atani kamrangko watgaltokahachim. An·tangtangko bame on·gipa manderangoni bang·batan nokdangrangko dake tom·tomao janggi tangna a·bachengtokahachim.
Indake ong·engon, adita salrangna skangsan, GNLA bobil dolko da·o bikottaina jotton ka·enga aro sak 500-na baten chadamberangko rimnape, Nagaland aro Myanmar a·songo skie ra·na watataha ine West Garo Hills a·jani police officer (DSP)-ni seatgipa chitti social media-rango gipe manderangni gisiko jajrengchakna nanganiko ra·bataiaha.
GNLA bobil dolko bikottaibebejagenchimoba iandakgipa koborrangchi tangka dabie ra·gipa manderangna aro dakait dake cha·gipa dolrangna cholrangko on·taiani gita ong·gnok ine manderangni gisiko kenani ong·kattaiaha.
Iandake GNLA bobil dolko bikottaina jotton ka·enga ine agananiko bang·a manderangan bebera·na man·tokjaengoba da·o salgni salgittam skangmangmang, GNLA bobil dolko bikottaina git asak 500 chadamberangko rimnapaha aro uamangna East Khasi Hills a·jani Rengdim samba jolo donggipa biap damsao skie on·enga ine mande saksa, social media-ni local news page-o seattaiaha.
Ia news page-o seatani gitade, da·o bikottaienggipa GNLA bobil dolko saksa Jingjang D Shira minggipa mande, chief executive director ong·e dilskaengachim. Ia kobor baksana Jingjang D Shira aro Nengsrang Sangma minggipa mandeni photo-koba watatahachim.
Indake ong·genchimoba, bobil dolko bikottaina jotton ka·enga ine seatgipa koborko bame on·gipa GNLA-ni gitcham membor-rangoni saksa raken jegalatskaaha.
“Ian manderangko kenatna tol·e seatanisan ong·aia maina uamang chadamberangna training-ko on·bebeenga ong·ode uamangni silchidarerangara bao? Ma uamang gol·dikrangchisa skie on·engama? Uamangni ia noksao gane mesokatenggipa camouflage-rangba asol ong·jasa. Uamangni mesokatenggipa noksarangba Garo Hills-oni ong·jasa aro Rengdim-de East Khasi Hills-o ong·ja indiba West Khasi Hills a·jaosa. Iarangkon uamang name ma·sichenggijasa, GNLA-ni bimingo manderangko kenatna jotton ka·enga,” ine GNLA dolni gitcham membor saksa parakataha.
Iani bidingo Meghalaya a·dokni Director General of Police (DGP) LR Bishnoi-o sing·sandiaton, uamang iani bidingo name am·sandianirangko dakenga ine parakataha.