SHILLONG: Ia bilsioba Garo Hills-o SSLC porikkani result-rang namtaijahani gimin, a·selko am·sandina gita a·dok sorkari, committee-ko songna tik ka·angaha.
Iani bidingo kobor ra·timgiparang baksa agangrikatengon, Garo Hills-o bilsiantian SSLC porikkani result namjaenganiara namen jajrengna nangani ong·enga aro iani a·selko ma·sie ra·na gita bakan sorkari, dingtang dingtang skulni dilgiparangko grongegen ine Mongolbar salo, a·dokni Education Minister Rakkam A Sangma parakataha.
Education Minister-ni parakatani gitade, ia committee da·o antisa antignirangni gisepon dingtang dingtang dolrang aro skulni dilgiparangko gronge agangrikna a·bachengatgnok.
Meghalaya a·dokko aro Shillong songjinmako bida on·chakram ine mingsing minggamaniko ra·bapilna nangenga ine janapatengon, “Garo Hills-o result-rang namgijanio maiba neng·nikanirang dongengnaba gnang aro chinga lekka porako pilak gadangon namdapatna nangnikenga,” ine Sangma aganaha.
Garo Hills-o SSLC porikkako pass ka·ani percentage, re·anggipa bilsiode 34 percent-na batangahachim indiba ia bilsiode 31.94 percent-ona tang·onpiltaiahachim. Ia bilsio Meghalaya a·dok gimiko SSLC porikkako pass ka·ani percentage-ara 51.93% ong·skaahachim.
Ia bilsio SSLC porikkako Garo Hills gimikni sak 22,925 chatro chatrirang seahachim indiba sak 7,323 chatro chatrirangsan pass ka·na man·aiahachim.
