TURA: Da·o dipet Meghalaya a·dokni reservation policy-o Garo, Khasi aro Jaintiarangna 80 percent-ko kangengani gimin ia jagittamni manderangan chu·onga gita namgnirangko man·enga ine Sukrobar salo, Tura-ni BJP MDC Bernard N Marak parakatenba, a·dokni reservation policy-ko apsan daken donaichina aro kal·akjachina didianiko on·angaha.
Marak-ni parakatani gitade, 1972 bilsio ra·gatgipa job reservation policy-ko ja·rikbaahani a·selan Meghalaya a·dokni Garo, Khasi aro Jaintiarangni gisepo nanga gita dakchakanirangko man·ahachim indiba ia reservation policy-ko da·o taridaptaina nanggenchimode jatgittamni manderangnan gimaanikosa ra·baani cholrang dongskaenga.
“Batanggimin bilsi 50-na a·dokni jatgittaman ia reservation policy-ni namgnirangko man·aha indiba ia reservation policy-ko taridapanio ong·na sienggipa a·selrangko dilgiparang niksamsogija ja·ku de·na nanggenchimode namjabata obostarang ong·naba gnang,” ine Tura-ni MDC mikrakataniko on·angaha.
Marak-ni parakatani gitade, ia state reservation policy-ko bang·gija dingtangatna nanggenchimoba da·o jatgittamni man·enggipa 80 percent-oniko 30 percent-kode gimaatnaba gnang aro ian jagittamni chadamberangna dal·bea gimaani ong·gen.
“Uni gimin Meghalaya a·doko songdongenggipa Garo, Khasi aro Jaintia chadamberangni namgnina ia jatgittaman a·bachengo tikatgimin 80 percent-ko rakkiangkuna apsan nangrime ja·kuko de·na nangenga. Jatgittamni gisepo maiba meligrikgijanirang donggenchimode iako jatgittamni gisepon agangrike namatna man·aigen. Ia reservation policy-o Garorang bang·bate dabienga ong·ja indiba batanggimin somoirango gimaatna nanggipa bak rengsirangko gapatchinasan nangnikenga,” ine Marak talataniko on·angenba, da·o gita a·doko ia reservation policy-ni bidingo meligrikna man·jagenchimode a·doko jatgittamni tom·tome janggi tanganiko golmal ka·ani gita ong·naba gnang ine mikrakataniko on·angaha.
