SHILLONG: A·dokni revenue ba kajina man·anina rikchengjaode, reservation policy-ko nipilaia mangmangchide chadamberangni kam gri ong·aniko naljokatna man·jawa ine Congress Legislature Party (CLP) dilgipa Ronnie Lyngdoh aganaha.
Reservation policy-ko nipilani bidingo party chanchianiko dakenga ine aganengon, reservation policy-ko nipilaniko dakaia mangmangde kam tikjani a·sel chagrongenggipa neng·nikanirangko namatna man·jawa ine Lyngdoh aganaha.
“Badiaba dolni quota-ko bariataha ine chanchibo. Unode uamangni kamgrianiko namatgnokma? An·ching uarangko namedake niatna nanggen. Badita sak kam grigipa chadamberang employment agency-rango uamangni bimingrangko segataha ba badita sak chadamberang kamna senge dongenga? Uarangko an·ching niatna,” ua aganaha.
“Reservation policy-ko chinga nipiljawa inede aganjaenga. Indiba an·ching apalbate niatna nanggen. Chanchichipe reservation policy-ko nipilahaode, kamgrianiko ba kam man·gijaniko chel·atgnokma? Saksa niam tarigipa ong·e, an·ching sak 60 gimikan iani gimin chanchina nanggen,” Lyngdoh aganaha.
“An·ching maikoba man·baani ba man·dapanirangni gimin chanchina ga·akenga. Botgipa ba bading chiwalgiparangko salbana nanggen. Jedakode uamangchi bang·bata kamrangko nakatatna man·gen aro bang·bata kajinarangko nakatatna man·gen. A·dokni GSDP tang·dojokon kamrangko bang·bate nakatatna man·gen” ine ua agandapaha.
“Reservation policy-ko nipilana agreba a·dokna revenue man·bagnini giminba niatna. Unode kamrangko man·ani cholrang ong·katbaaigen. Uarangko an·ching dakjaode, reservation-ko nipilaichide kam man·gijaniko chel·atna dakani chu·ongja,” ua aganaha.
Reservation policy aro expert committee-ni bidingo aganengon, “Ian chingni, nang·ni u·igipa mamla ong·ja, an·ching iana chanchina somoi nanggen. Iako chanchianio adita jarang nanggen. Iana chanchininge kam ka·na nanggen,” Congress dilgipa aganaha.
“ Iani chanchianio jasa, jagni, jadok nangnaba donga, jadok ba bilsisa ra·srangon nambatgipa ong·naba donga, Chinga iani bidingo namedake chanchibewal policy-ko dakgen jedakode darangna gimaani ong·jawa. Ta·rake tik ka·galgalenba sanaba gimaaniko ra·baode ja·mano sikkimpilnaba donga,” Lyngdoh aganaha.
Ua agandapa je, “Badita an·chingni chadamberang kam sanditokenga? Neng·nikaniko mingsandingding niainabe. Pilakni gitan sulsul niatna nanggen” ineba Congress dilgipa aganaha.
