Tura: Roster system-ni bidingo man·a dipet ta·rake chanchibewalaniko dakna Chief Minister Conrad Sangma, uni cabinet-o kam ka·rimskarang, a·dokni Chief Secretary DP Wahlang baksa Garo Hills-oni dol 18 NGO, community dilgiparang aro buchuma-budeparangko grongaha.
Sukrobar salo Tura-o meeting-ko ba tom·aniko do·ga chipchangao ong·atangaha. Reservation roster-ni bidingo name dake tale u·ie ra·na miksonganio tom·aniko ong·atangaha.
Tom·anio Garo Hills-oni dilgiparang- gitcham MDC Augustine Marak (GNC) aro gipinrang, gitcham MLA H.M Shangpliang, deputy Chief Minister Prestone Tynsong, Minister Dr. M Ampareen Lyngdoh, IAS (Chief Secretary) D.P Wahlang aro gipinrang bak ra·angtokaha.
Tom·a matchota ja·man Chief Minister Conrad, kobor ra·timgiparangna indine u·iataha, “roster system-ni bidingo talate on·na miksonganio aro presentation-ko nika ja·man maidake maiko chanchia ba maiba sing·anirang dongode, uarangko talate on·na miksonganio tom·aniko ong·ataha.”
“A·dok cabinet, salgni salgittamni ja·man roster system-ko ra·gatani bidingo chanchirimna tom·taigen.”
“Tom·anio bak ra·giparangoni bang·an Reservatioin Policy-ni gimin sing·tokaha, uamangna, name dake talate on·angaha, ine CM aganaha.
Roster system-ni bidingo chanchiriman gimik party baksa tom·mitingo political committee-ko songna chanchirimaniko dakangaon, expert committee-koba songjolna agan-ku·pattiaha, jekon sorkari namnike ra·chakaha. Committee-ko songa matchotaon, committee-ko stakeholders ba daitoko jako ra·e kam ka·dilgipa ba dakdilgiparang gimikkon gronge sandianiko dakanggen, ine Conrad talataha.
Indake ong·engon tom·anio bak ra·anggipa NGO-rangara- GSU, FKJGP, ADE, AYWO aro gipinrang bak ra·tokaha.
