TURA: Ia sal somoirango Meghalaya a·dok gimikon state reservation policy aro roster system-ni bidingo jera ra·grikanirangko nikna man·engon, Meghalaya a·dokni Scheduled Caste (SC) gadango ga·akgipa jatrangnaba reservation policy-o 5 percent-ko kangchina South West Garo Hills Scheduled Caste Welfare Association, a·dok sorkario dabiangaha.
Iani bidingo a·dokni Chief Minister Conrad Sangma-na sedoatengon, Meghalaya a·doko Tribal-rangko chel·chakna gita Indian Constitution-ni Sixth Schedule donggenchimoba a·doko Scheduled Caste gadangni manderangde maming cholrangko man·tokpajaenga ine association-ni dilgiparang parakatenba, a·doko songdongenggipa Scheduled Caste gadangni manderangnaba cholrangko on·na gita reservation policy-o 5 percent-ko chamna nanga ine didiataha.
Indian Constitution-ni Article 15 (4) aro 26 (4)-ni ning·o Scheduled Caste aro Scheduled Tribe dolgninan lekka pora, kam aro gipin cholrangko man·na gita niamrangko donmanahachim ineba Scheduled Caste Welfare Association parakataha.
“Meghalaya a·doko Scheduled Caste-rangni jelbra jelsuani sak 25,000-mangni gitasan ong·e a·dok gimikni jelbra jelsuaoni 0.58 percent-san ong·aia aro Meghalaya a·doko Reservation Policy-ni a·selan Scheduled caste gadangni manderangde chol man·batsranggijagiparang ong·enga. Skangode Hajong, Koch, Rabha, Bodo aro Scheduled Caste jatbongana 5 percent biapko donachim indiba Maan jatkoba Scheduled Tribe ine chanani ja·man da·o ia jatdokni manderang 5 percent-kon suale ra·na nangao ga·akengaha aro ian namen kragijani ong·enga,” ine Chief Minister-na sedoatgipa memorandum-o Scheduled Caste Welfare Association parakataha.