SHILLONG: Payment for Ecosystem Services (PES)-ni ning·o Meghalaya a·dok gimikni hectare 50,000 a·arangko man·gopna gita a·dok sorkari, dingtangmanchagipa program-ko a·bachengatna sienga ine Mongolbar salo, a·dokni Chief Minister Conrad K Sangma parakataha.
Ia PES-ara samtangtango donggipa buring bolgrim aro chiring chibisikrangko name rakkina gita sorkarini a·bachengatgipa program ong·achim aro ia program-ni ning·o samtangtango ong·telaigiparangko nirok sandienggipa songni nokni manderangna sorkari, tangka paisarangko on·skaengachim.
Mongolbar salo World Environment Day-ko Shillong songjinmani State Convention Centre-o manianio a·dokni Chief Minister, jinmana aganprakangengon, ia PES-ni ning·o samtangtango ong·telaigiparangko ripinge rakkina gita sorkari, dingtang dingtang dolrang aro songni nokni manderang baksa nangrime kamko ka·enga ine parakataha.
Buring bolgrimrang donggipa dingtang dingtang songni manderangna ua bang·bea tangka paisani cheque-rangko sualataha ine janapatengon, je songrangan buring bolgrim donggipa hectare 125 a·arangko sorkarina on·gen, uandakgipa songrangna, buring bolgrimrangko tange rakkina gita bilsio gong lak 25-mangko sorkari on·gen ine Chief Minister parakataha.
Da·o mikkang bilsi bongani gisepo, songni nokni manderang kamrangko ka·na aro janggi tangani cholrangko dake ra·na gita gimik gong kror 1.25 tangkarangko man·gen ineba Chief Minister parakataha.
Ia program-ko ong·atanio a·dokni Chief Minister, dingtang dingtang chiring chibisikrangko rongtalatahani gimin aro samtangtangko rongtal an·tale rakkiahani gimin dingtang dingtang songni dilgiparangna aro songsalna kam ka·enggipa dolrangnaba mande ra·pilskaaniko dakangjolaha.
