TURA: Early Childhood Development Mission-ni bidingo songni nokni manderangna agan-talate on·na gita Budbar salo, dingtangmancha Community Sensitization program-ko Phulbari-ni Shyamnagar Community Conference Hall-o ong·atangaha.
Ia program-ko ong·atanio, Social Welfare department-ni Director DD Shira, jinmana aganprakangengon, ia Early Childhood Development Mission ba program-ara, bi·sarangna an·seng baljokani aro uandakgipa cholrangko on·na miksonge ra·gatgipa program ong·a aro chonmitingon bi·sarang an·seng baljokani aro dingtang dingtang cholrangko man·genchimode dal·ahaon uamang an·seng baljokgiparang ong·e a·songna aro jatna nambate dangdike on·giparang ong·na man·gen ine parakangaha.
Ia program-ko health, social welfare, education aro community & rural development department-rang baksa nangrime ra·gataha ineba Shira parakataha.
Ia program-ko ong·atanio Selsella-ni CDPO Madonna T Sangma-ba jinmana aganprakengon, ia Early Childhood Development program-ni ning·o, ICDS program-ni ning·o man·chapjaenggipa dam 1554 songrangna kamko ka·gen aro ian bi·sarangni namgnina ra·gatgipa program ong·a ine parakangaha.
Ia program-ko ong·atanio dongpae bakko ra·anggipa gipin manderangara, West Garo Hills a·jani Deputy Commissioner Jagdish Chelani, DRDA-ni Project Director Dolrich Berin G Momin, SDSEO Rajan Hajong aro gipinrang ong·a.
