SHILLONG: Bristibar salo, Meghalaya Legislative Assembly building-ko rikna songako man·gipa High Powered Committee-ni tom·aniko Shillong-ni Taj Vivanta-o ong·atangenba, da·o Assembly building-ni gnigipa bakna proposal tarianiko ra·chakangaha.
Ia tom·anio Assembly-ni Speaker Thomas A Sangma baksana a·dokni Chief Minister Conrad K Sangma, Deputy Chief Minister sakgni, chong·motan Prestone Tynsong aro Sniawbhalang Dhar, gipin MLA-rang aro dingtang dingtang department-ni officer-rangba dongpae bak ra·angtokaha.
HPC-ni tom·aniko ong·atani ja·man, Assembly-ni Speaker Thomas A Sangma, kobor ra·timgiparangna talate on·angengon, ia tom·anio Assembly-ni mongsonggipa building-ko rikani report-ko ra·angan baksana gnigipa bakko rikani proposal-ko tariani bidingo chanchiangaha aro security system-rangni giminba niangaha ine parakataha.
Gital Assembly building-ni gnigipa bakna proposal-ko High Powered Committee, Assembly Secretariat aro line department-rangba ra·chakahani gimin da·o proposal-ko DoNER Ministry-na pakwate on·atgnok ineba Speaker parakataha.
