SHILLONG: Khasi Hills jolrango songdongenggipa A·chikrangnaba, Meghalaya a·dokni Job Reservation Policy-o Khasirangna on·enggipa apsan bak rengsikon tikatpachna gita Khasi Hills-ni Garo Students Union (GSU) Khasi Hills Zone, A·chik Holistic Awakening Movement (AHAM) South West Khasi Hills Zone, All Khasi Hills A·chik Federation (AKHAF) aro United A·chik Youth Federation (UAYF), a·dok sorkario dabiangaha.
Iani bidingo a·dokni Chief Minister Conrad K Sangma-na sedoatengon, Khasi Hills jolrango songdongenggipa A·chikrangkode skangonin nichanggalengani a·sel pilakni gitan ja·manchakatako man·enga ine Khasi Hills-ni A·chik NGO-rang parakatenba, Khasi Hills-o songdongenggipa A·chikrangnaba Khasi-rang gita apsan bak rengsikon tikatchina didiataha.
A·chik NGO-rangni parakatani gitade, Khasi Hills jolrango chengonin A·chikrangba, an·tangtangni a·kingrang donge songdong a·chabaenggiparang ong·achim indiba Meghalaya a·dokni Reservation Policy-o Tribal jat dolgittamna chamgipa 80 percent-oniko Khasi Hills-ni A·chikrangde man·pajaengachim.
A·songni niam bidiko, A·chikrangko man·chape pilak jatrangnan apsan bil aro cholrangko on·china niamko donahaoba Khasi Hills-o songdongenggipa A·chikrangde ia policy-ni maming namgnirangko man·tokjaenga ineba Khasi Hills-ni A·chik NGO-rang parakataha.
Khasi Hills-o songdong a·chaenggipa A·chikrangnaba 80 percent-oniko tikatchina gita a·dok sorkariko didiatengon, Khasi Hills-o songdongenggipa A·chikrangna bak rengsiko tikatjana gita maming dongimin niamrangba dongjachim ine NGO-rang parakataha.
Khasi Hills-ni A·chik songrango donggipa sorkari skulrangni gimin janapatskaengon, ia skulrango Garo subject-rangnaba A·chik ong·gijagipa manderangkosa aro Garo subject-na qualification donggijagipa manderangkosa skigipani kamna ra·enga ine A·chik NGO-rang, suk ong·gijaniko parakatenba, iani a·selan Garo subject-ko ra·enggipa A·chik chatro chatrirang neng·nikanirangko chagrongna nangenga ine parakataha.
Ia skulrango Garo subject-na A·chik skigiparangkosa rakkichina gitaba NGO-rang dabiangaha.
