TURA: South Garo Hills a·jani Gasuapara jolo koela badinggipa aro songni manderangoniko bang·en badi ka·anirangko man·ahani gimin koela badinggipa Balwan Bhama-ko salgnini gisepon Gasuapara Land Customs port-ko wate re·angchina gita Gasuapara songni Nokma u·iataniko on·atenba, ia ge·etaniko manijagenchimode uni kosako rakgipa ja·kurangko de·na draatako man·gen ine mikrakataniko on·angaha.
Koela badinggipa Balwan Bhama ba Soni ine mingklakgipa mandeara, gipin a·dokrangoniko koela salna gita e-way bill-ko jakkalna man·gipa mande ong·achim indiba ua ia e-way bill-rangko jakkale, Nongalbibra-Jadi jolrangonikon niam gri ra·e salskaengachim.
Ia mandeko batanggimin bilsirangoba, kajina gamchipgija dongani gimin Assam Police rim·ahachim.
Indake ong·engon, ia bilsioba ua changsataie Coal India Limited (CIL)-ni koela salna dakkianiko man·enba Gasuapara Land Customs port-ona re·bataiaha aro untalan ua Gasuapara Land Customs gita uni challanrangchi koelarangko saltaiengahachim.
Ia mande, Gasuapara jolrango koela badingenggipa bang·a manderangnan koelarangko salna gita e-way bill-rangko on·gen ine ku·rachakenba, uamangni krorni kror tangkarangko ra·aha indiba uni kamrangko kachari chipatani ja·man, ua manderangna ku·rachakaniko chu·sokatna man·jaha.
Ja·mano Gasuapara jolo koela badingenggipa manderang, an·tangtangni tangkarangko on·pilchina aganon ua uamangni tangkarangko on·pilna jechakskaaha aro songni manderangkosa kachariona rimangna ka·mikkenatpilaha ine u·iataha.
Uni iandake songni manderangko aro ua jolrango koela badingenggipa manderangko cha·bokna jotton ka·ahani gimin songni manderang jinma, Gasuapara songni Nokma baksa June-ni 6 tariko tom·aniko ong·atangaha aro uko Gasuapara-oniko a·rikgalna gita tik ka·angaha ine kobor on·timgiparang parakataha.